Nils Folmer með ljósmyndabók um Jöklu

Ljósmyndabókin Þetta er Jökla, eða á ensku This is River Jökla eftir Nils Folmer Jörgensen kom út fyrir jólin. Bókin fór ekki í jólabókaflóðið heldur var hún aðeins prentuð í hundrað eintökum. Þröstur Elliðason leigutaki Jöklu segir að hann hafi leitað til Nils með skömmum fyrirvara og að hann hafi á mettíma sett saman eigulega ljósmyndabók af djásninu í veiðivatnasafni Strengja sem er fyrirtæki Þrastar. Bókinni var svo vel tekið að Þröstur íhugar nú að bæta um betur og prenta hana í stærra upplagi.

Nils Folmer, höfundur bókarinnar er landsþekktur veiðimaður, leiðsögumaður og grafískur hönnuður.

Höfundur léttklæddur í Austurlandsblíðunni við einn af fjölmörgum veiðistöðum í Jöklu. Ljósmynd/Nils Folmer

En af hverju þessi bók?

„Það er ekkert launungarmál að ég eyði umtalsverðum tíma á hverju ári við veiðar um allt Ísland. Ég á orðið fimm uppáhalds ár sem ég reyni að komast í á hverju sumri. Einn af þessum gimsteinum er Jökla, á sem margir veiðimenn hafa ekki enn kynnst.

Þessi bók er mín viðleitni til að kynna þessa mögnuðu á í sínu stórkostlega umhverfi fyrir fleirum.

Kort fylgir af allri ánni og fjölmargir veiðistaðir eru merktir þar inn á. Í bókinni er einnig sýnt frá fjórum hliðarám Jöklu. Ljósmynd/Nils Folmer

Bókin er eins konar ferðalag um Jöklu þar sem meðal annars er horft til landslags, veiðistaða og reynt að varpa ljósi á hversu mikil paradís Jökla er fyrir þennan magnaða fisk, laxinn.“ Nils er sáttur með útkomuna en hefði viljað hafa meiri tíma og segja fleiri sögur. En kannski kemur það síðar.

Í bókinni er ferðast upp Jöklu og skoðuð þau fjögur veiðisvæði sem tilheyra henni og nánasta umhverfi. Fyrst er það neðsta svæðið sem Nils kallarLower Jökla, enda er bókin skrifuð á ensku þó að hún sé fyrst og fremst ljósmyndabók. Þá er það mið svæðið og loks efsta svæðið. Sérstakur kafli er svo um hliðarárnar, Kaldá, Fögruhlíðará, Fossá og Laxá. Í bókinni segir að þessar fjórar ár bjóði samtals upp á fimmtíu kílómetra af vatni þar sem lax getur gengið. Slepping á seiðum var aukin í hliðaránum í fyrra svo áhugavert verður að fylgjast með framvindu þar í sumar.

Á efsta hluta Jöklu er enn mikið af veiðistöðum sem hafa lítið eða ekkert verið kannaðir enn sem komið er. Ljósmynd/Nils Folmer

Það er ljóst að Jökla er komin á kortið sem ein af stóru ánum á Íslandi. Ljósmyndabók Nils Folmers varpar skemmtilegu ljósi á þessa mikilfenglegu á og satt best að segja kom Sporðaköstum skemmtilega á hversu heillandi heildarmynd ljósmyndirnar drógu upp af spennandi laxveiðiá.

Upp á dönsku þá gratúlerum við Nils með bókina.

• Blogga um frétt

Seinustu hundraðkallar sumarsins