RÁÐSTEFNA verður haldin á Hótel Loftleiðum um jafnréttisstarf sveitarfélaga í dag, föstudaginn 16. nóvember frá kl. 13 til kl. 17.

RÁÐSTEFNA verður haldin á Hótel Loftleiðum um jafnréttisstarf sveitarfélaga í dag, föstudaginn 16. nóvember frá kl. 13 til kl. 17.

Þetta er lokaráðstefna Evrópuverkefnis sem nefnist Jafnréttisvogin, eða Tea for two – Illustrating Equality, og fer hún fram á ensku. Ráðstefnan er öllum opin án endurgjalds.

Verkefnið snýst um að þróa tæki til að mæla stöðu jafnréttismála í sveitarfélögum. Tilgangur þess er að gera stöðu jafnréttismála sýnilega og aðgengilega almenningi. Spurningar sem varða hlutfall kvenna og karla í stjórnunarstöðum, atvinnuþátttöku kynjanna og þátttöku kynjanna í ákvarðanatöku voru sendar til sveitarfélaga. Þátttakendur í verkefninu eru, auk Íslands, Búlgaría, Finnland, Grikkland og Noregur. Auk samanburðar á milli sveitarfélaga innanlands er því hægt að bera saman niðurstöður á milli landanna. Niðurstöðurnar eru birtar á myndrænan hátt. Jóhanna Sigurðardóttir, félagsmálaráðherra, opnar ráðstefnuna með ávarpi. Kjartan Ólafsson frá Rannsókna- og þróunarmiðstöð Háskólans á Akureyri skýrir frá heildarniðurstöðum, en síðan munu fulltrúar þátttökulandanna segja frá niðurstöðum í hverju landi fyrir sig. Þá ræðir Katrín Björg Ríkarðsdóttir, deildarstjóri samfélags- og mannréttindadeildar Akureyrarbæjar, um notendagildi verkefnisins út frá sjónarhóli sveitarfélaga. Loks stýrir Dagur B. Eggertsson, borgarstjóri Reykjavíkur, pallborðsumræðum. Fundarstjóri er Hildur Jónsdóttir, formaður Jafnréttisráðs.