[ Smellið til að sjá stærri mynd ]
Verktakar sem aðrir kunna yfirleitt vel við tæki og tól sem uppfylla þeirra þarfir en eru þó á skynsamlegu verði.
Verktakar sem aðrir kunna yfirleitt vel við tæki og tól sem uppfylla þeirra þarfir en eru þó á skynsamlegu verði. Við núverandi efnahagsaðstæður fækkar slíkum tækjum látlaust en á sama tíma geta skapast aðstæður fyrir ný tæki á markaðnum, sér í lagi fyrir nýja og óþekkta aðila. Við höfum séð hið sama gerast t.d. þegar Hyundai ruddi sér til rúms á vinnubílamarkaðnum en nú gæti tíminn verið kominn á sókn úr austri.

Hinn rúmenski Renault

Eftirspurning eftir ódýrum, litlum og liprum pall- og sendibílum er hiklaust til staðar, spurningin er hins vegar sú hvort nú sé tækifæri fyrir aðkomu Dacia á vinnubílamarkaði Íslands. Dacia er undirmerki Renault en bílarnir eru framleiddir í Rúmeníu og þykja á meginlandi Evrópu sterklega verðlagðir en jafnframt traustir þar sem Dacia sækir sinn tæknibúnað í smiðju Renault. Þannig má líkja innkomu Dacia á Evrópumarkað við innkomu Skoda í lok síðustu aldar en Skoda byggir sem kunnugt er á tækni frá VW.

Hvað er í boði?

Dacia Logan Pickup er líklega með ódýrustu pallbílum sem fyrirfinnast. Pallbíllinn mun kosta rétt rúmar 7 þúsund evrur – það er þó líklega til lítils að umreikna upphæðina í krónur þar sem gengi hennar er með eindæmum sveiflukennt um þessar mundir, en reikni hver fyrir sig ætti það að sjást að hér er kominn bíll sem er vel samkeppnisfær.

Tollar á pallbílum eru 13% og því er vinnubíll í þessum stærðarflokki afar ódýr til innflutnings. Enn sem komið er hefur ekki verið hafinn innflutningur á Dacia þannig að um yrði að ræða „gráan innflutning.“

Fyrir rúmar 7 þúsund evrur fæst lítill bíll í stærð á við Skoda Fabia með 800 kílóa burðargetu, palllengdin er 1,8 metrar og að auki er 300 lítra farangursrými bakvið framsætin en Dacia er eins og sönnum pallbíl sæmir aðeins tveggja sæta.

Bílinn skortir lítið í vélarúrvali en þar er byggt á þrautreyndum og sparneytnum vélum Renault og skilar 1,6 lítra bensínvél t.d. 90 hestöflum en einnig verður hægt að fá 70 hestafla 1,5 lítra dísilvél. Búast má við því að í innkaupum sé grunngerð Dacia um helmingi ódýrari en sambærilegur bíll frá t.d. Skoda, Renault eða Peugeot en Dacia mun einnig fást með húsi þegar fram líða stundir.