— 24stundir/Ómar
Einn róttækasti geimverufræðingur heimsins, Stewart Swerdlow, er staddur hér á landi. Hann mun um helgina fræða landsmenn um geimverur, hugstjórnun stjórnvalda, einræði Illuminati-fjölskyldnanna og illsku Evrópusambandsins.
Eftir Viggó I. Jónasson

viggo@24stundir.is

„Þegar þið verðið dregin inn í Evrópusambandið og lendið undir stjórn annars lands, þá mun allt breytast. Evrópusambandið er af hinu illa ef fólk aðhyllist sjálfstæði og frelsi,“ segir geimverufræðingurinn Stewart Swerdlow en hann er staddur hér á landi um þessar mundir og mun halda röð fyrirlestra um helgina í Gerðubergi.

Ísland síðasta vígið

Samkvæmt Swerdlow stendur frelsi einstaklingsins mikil hætta af alþjóða hugstjórnunarsamsæri sem teygir anga sína út um alla veröld.

„Ísland er einn af síðustu stöðunum á jörðinni, sökum einangrunar, sem hefur ekki verið sýktur af stjórnunarkerfinu. Það er hins vegar að breytast og við erum að sjá breytingar á Íslandi þess efnis. Fólk hér verður að vera meðvitað um hvað er að gerast fyrir landið.“ Að mati Swerdlows munu þessi hugstjórnunaráhrif ná að skjóta hér rótum ef Ísland gengur í Evrópusambandið og ráðleggur því Íslendingum eindregið að halda sig utan við það samstarf.

En hvaða stjórnvöld skyldu það vera sem standa á bak við þetta alþjóðasamsæri? „Það er í raun engin ein ríkisstjórn sem stendur fyrir þessu heldur er þetta hnattræn kúgun. Höfuðpaurinn á bak við þetta allt mun vera hæstráðandi Illuminati-fjölskyldnanna.“ Illuminati sem Swerdlow vísar til eru víðfræg leynisamtök sem voru meðal annars áberandi í skáldsögu Dans Browns, Englar og Djöflar.

Geimverurnar búa neðanjarðar

Stór hluti af skoðunum Swerdlows tengist tilvist geimvera í eðlulíki, sem nefnast Reptilians og búa neðanjarðar. „Þeir voru fyrstu landnemarnir á plánetunni og mannkynið er í raun að hluta Reptilian. Við erum með eðluheilastofn og eðluskinn. Ef við fylgjumst með fóstri í móðurkviði þá er það fyrstu vikurnar í eðlulíki en breytist síðar yfir í mannveru.“

Swerdlow vonast til þess að heimsókn sín til Íslands nái að vekja landsmenn til umhugsunar áður en það verður um seinan.

„Í raun og veru er ég að hjálpa fólki að ná stjórn á huga sínum og líkama svo það geti skapað sér það líf sem það kýs, án utanaðkomandi áhrifa.“

Í hnotskurn
Swerdlow segist hafa verið notaður sem tilraunadýr í hugstjórnunartilraunum CIA um árabil. Nánari upplýsingar um Swerdlow og fyrirlestra hans er hægt að fá á heimasíðunni www.human.is.