Frá Sviss Fjármálamiðstöðin Sviss er talin geta liðið fyrir það að bankaleynd verði aflétt af ríkjum sem veita skattaskjól, eins og kröfur eru um.
Frá Sviss Fjármálamiðstöðin Sviss er talin geta liðið fyrir það að bankaleynd verði aflétt af ríkjum sem veita skattaskjól, eins og kröfur eru um. — Reuters
Eftir Grétar Júníus Guðmundsson gretar@mbl.is ÞRÝSTINGUR á þau ríki sem veita skattaskjól hefur aukist gríðarlega að undanförnu og allt útlit er fyrir að hann muni aukast enn frekar á næstunni. Ástæðan er eðlilega rakin til fjármálakreppunnar.

Eftir Grétar Júníus Guðmundsson

gretar@mbl.is

ÞRÝSTINGUR á þau ríki sem veita skattaskjól hefur aukist gríðarlega að undanförnu og allt útlit er fyrir að hann muni aukast enn frekar á næstunni. Ástæðan er eðlilega rakin til fjármálakreppunnar. Sum þeirra ríkja sem teljast til skattaskjóla eru nú þegar farin að veita upplýsingar sem þau gerðu ekki áður, samkvæmt frétt AFP -fréttastofunnar.

Efnahags- og framfarastofnunin í París, OECD, hefur verið leiðandi í því að hvetja til aukins gagnsæis í skattamálum. Þá voru þau skilaboð send út eftir fund leiðtoga þeirra Evrópuríkja, sem funduðu síðastliðinn sunnudag vegna undirbúnings að væntanlegum fundi leiðtoga 20 helstu iðnríkja heims í aprílmánuði næstkomandi, að taka þyrfti saman lista yfir þau ríki sem sýna ekki samstöðu í þessum málum. Markmiðið er að þrýsta á aukna samvinnu. Að auki hefur Bandaríkjastjórn orðið nokkuð ágengt í að fá upplýsingar frá svissneska bankanum UBS, sem tengjast grunsemdum um skattsvik.

Í fréttaskýringu CBS -sjónvarpsstövarinnar nýlega var því haldið fram að með aukinni aðild stjórnvalda að bönkunum mundu þessi mál taka nýja stefnu.