Brids - Guðmundur Páll Arnarson | ritstjorn@mbl.is

Trompslag fórnað.

Írska konan Rebecca O'Keeffe sat í sæti vesturs, í vörn gegn hálfslemmu í laufi. Austur hafði doblað fyrirstöðusögn norðurs í hjarta og O'Keeffe kom þar út. Suður var Skotinn Victor Silverstone. Hann tók á ♥Á, spilaði tígli tvisvar og henti hjarta. Spilaði síðan laufi á drottninguna.

Sagnhafi hefði helst viljað að svíningin misheppnaðist, því þá mætti síðar komast inn á ♣10 til að gæða sér á tíglunum. En nei, svíningin heppnaðist – eða það hélt Silverstone. O'Keeffe dúkkaði nefnilega án minnsta hiks. Silverstone spilaði næst ♣G að heiman og aftur gaf O'Keeffe slaginn! Hún fórnaði trompslagnum fyrir tvo á spaða síðar. Es. Það er nauðsynlegt að dúkka fyrsta trompið fumlaust, því ef sagnhafi hefur grun um kónginn í vestur spilar hann næst smáu laufi að tíunni.