Jóhanna Ingadóttir
Jóhanna Ingadóttir
JÓHANNA Ingadóttir úr ÍR hjó nærri Íslandsmeti Sunnu Gestsdóttur í langstökki kvenna á Gautaborgarleikunum á laugardaginn. Jóhanna stökk 6,16 metra og sigraði í langstökkskeppninni. Í gær gerði hún sér lítið fyrir og sigraði líka í þrístökkskeppni mótsins og stökk þar 12,84 metra.

Eftir Kristján Jónsson

og Víði Sigurðsson

sport@mbl.is

Jóhanna bætti sinn besta árangur í langstökkinu um 7 sentímetra en hún stökk 6,09 í Sarajevo um fyrri helgi og vann langstökkskeppnina í Evrópukeppni landsliða í 3. deild.

Árangur Jóhönnu er 14 sentímetrum frá Íslandsmeti Sunnu Gestsdóttur sem hún setti á Möltu árið 2003. Miðað við árangur Jóhönnu að undanförnu þá virðist met Sunnu vera í stórhættu. Bryndís Hólm á næst lengsta langstökk íslenskrar konu en hún stökk 6,17 í Edinborg árið 1983.

Keppendur í langstökkinu voru 32 en Gautaborgarleikarnir eru fjölmennasta frjálsíþróttamót sem haldið er á Norðurlöndum ár hvert með samtals 3.500 keppendum frá 20 löndum.

Í þrístökkinu jafnaði Jóhanna sinn besta árangur, sem hún náði í Sarajevo um fyrri helgi. Hún er 34 sentímetrum frá 12 ára gömlu Íslandsmeti sem Sigríður Anna Guðjónsdóttir setti í Óðinsvéum og stökk þá 13,18 metra. Jóhanna stökk 10 sentímetrum lengra en Kajsa Levin frá Svíþjóð sem varð í öðru sæti.

Íris Anna með Íslandsmet

Íris Anna Skúladóttir úr Fjölni setti Íslandsmet í 2.000 metra hindrunarhlaupi á 7:03,11 mínútum og bætti met Herdísar Helgu Arnalds úr Breiðabliki um tæplega 29 sek., en það var 7:32,40 mín. Íris Anna varð í 3. sæti í hlaupinu en hún er einnig Íslandsmethafi í 3.000 metra hindrunarhlaupi.