Sveinn Torfi Sveinsson

Liðin er meira en hálf öld síðan leiðir okkar Sveins Torfa lágu saman. Ekki var tilefnið jákvætt. Gagnfræðaskóli Austurbæjar, Vörðuskóli, var ekki nema nokkurra ára gamall þegar í ljós kom að hitakerfi hússins var hrunið. Verkfræðileg mistök orsökuðu það að lagnir brunnu sundur á þessum stutta tíma. Verkefni okkar Sveins Torfa var að bæta úr þeim skaða, hans að hanna nýtt hitakerfi, mitt að leggja kerfið með góðum samstarfsmönnum. Sveinn Torfi var þá nýkominn heim eftir nám ytra, ég enn nemi í pípulögnum. Við þetta verkefni unnum við sumarlangt og tókst að ljúka því áður en skóli hófst að hausti.

Sveinn Torfi kom með talsverðum gusti inn í íslenskan lagnaheim, honum fylgdu tæknilegar nýjungar sem átti vel við mig að meðtaka. Á næstu árum vann ég mörg lagnaverk sem Sveinn Torfi hannaði og voru sum þeirra æði frumleg og full ástæða til að segja frá þeim áður en það verður of seint þó ekki verði gert hér. Geislahitun var þá mjög að ryðja sér til rúms og í nokkur ár voru slík hitakerfi helstu verkefni mín og flest voru þau hönnuð af Sveini Torfa.

Sveinn Torfi hafði ákveðnar skoðanir á mönnum og málefnum og ekki síst á tæknilegum viðfangsefnum. Hann lá ekki á áliti sínu, það hvessti gjarnan ef honum fannst ekki nógu faglega staðið að verkum en hann sparaði heldur ekki hrósyrði ef honum fannst vel unnið.

Það er nokkuð langt um liðið síðan fundum okkar bar saman síðast. Það er mér ánægjuefni að hafa stuðlað að því að Sveinn Torfi fékk á þessu hausti viðurkenningu Lagnafélags Íslands fyrir lífsstarf sitt, það mátti ekki seinna vera og minnir okkur á hvað lífið er fallvalt.

Ég er þakklátur fyrir þau ár sem ég átti því láni að fagna að starfa með Sveini Torfa.

Ég sendi dætrum hans samúðarkveðjur.

Látinn er Sveinn Torfi Sveinsson verkfræðingur og formaður Félags íslenskra bifreiðaeigenda frá 1952 til 1956.

Sveinn Torfi starfaði með FÍB í yfir hálfa öld, hugsaði stórt og fór ekki alltaf hefðbundnar leiðir að settu marki. Hann var gerður að heiðursfélaga og  sæmdur gullmerki FÍB fyrir áratuga óeigingjarnt starf.
Sveinn Torfi stundaði framhaldsnám í verkfræði við Kaupmannahafnarháskóla undir miðja síðustu öld og ferðaðist á þeim árum víða um Evrópu. Hann heillaðist af uppbyggingu Þýskalands, sem reis á örfáum árum úr stríðsrústum til nútíma efnahagsstórveldis. Sveinn Torfi hugsaði stórt fyrir hönd þjóðar sinnar og trúði á bjarta framtíð í krafti nýjustu tækni.
Sveinn Torfi tók við formennsku FÍB á tímum innflutningshafta og gjaldeyrisskorts. Undir forystu hins unga og framfarasinnaða verkfræðings tvíefldist félagið og félagsmönnum fjölgaði verulega. Hann var óþreytandi talsmaður þess frelsis sem bíllinn veitir til hvers konar athafna, ferðalaga og skemmtunar. Sveinn Torfi var einbeittur andstæðingur hafta og ríkisforsjár og barðist gegn ofursköttun bílsins langt umfram framkvæmdakostnað við umferðarmannvirki.
Sveinn Torfi hvatti til framsýni í vegagerð og var einn af frumkvöðlum lagningar olíumalar á vegi og götur sem var bylting í gerð slitlags á tímum óvandaðra malarvega og torfærra slóða. Hann skrifaði fjölda greina um hugðarefni sín vegamál, umferðaröryggi og bíltækni.
Stjórn og starfsfólk Félags íslenskra bifreiðaeigenda kveður með söknuði  sterkan liðsmann og leiðtoga sem alla tíð hafði hag bifreiðaeiganda að leiðarljósi. Félagið vottar afkomendum og ástvinum Sveins Torfa Sveinssonar samúð sína.

Elsku afi, það er svo erfitt að kveðja.

Ég á svo margar góðar minningar frá ykkur ömmu. Það var alltaf best í heimi að koma í heimsókn til ykkar í Hraungarða. Það var svo vel tekið á móti manni, amma skellti í vöfflur og dró fram stellið og lagði fínt á borð og þú bauðst upp á skrifstofu-kók. Svo var setið og manni gefinn tími til að ræða um allt sem mann lysti á meðan kræsingunum var skolað niður.

Margt af því sem ég geri í dag er mótað af ykkur og þakka ég ykkur fyrir það, ég hef alltaf litið upp til ykkar. Það líður varla sá dagur er ég hugsa ekki um þá tíma sem þið voruð með opna arma og voruð svo þakklát fyrir að ég skyldi nenna í heimsókn til svona gamals fólks en það voru þið sem gáfuð mér svo mikið, að það er ég sem er þakklát.

Ég náði að kveðja þig elsku afi á Hrafnistu kvöldið áður en þú kvaddir og þrátt fyrir að þú værir í djúpum svefni og ættir erfitt með andardrátt hélstu þéttingsfast í hendina á mér og vil ég trúa því að þú hafir vitað af mér þarna grátandi þér við hlið.

Ég vona innilega að þið amma séuð á góðum stað saman og ykkur líði vel, því með því er auðveldara að halda áfram og skilja að svona sé lífið. Þið lifðuð frábæru athafnasömu lífi og fenguð að kynnast barnabarnabörnum sem eiga eftir að muna eftir ykkur sem og við öll hin. Ykkar er og verður sárt saknað.

Ykkar barnabarn