Góður Frank Lampard skoraði tvennu gegn Birmingham.
Góður Frank Lampard skoraði tvennu gegn Birmingham.
Chelsea komst í gærkvöldi í toppsæti ensku úrvalsdeildarinnar í knattspyrnu með því að sigra Birmingham örugglega, 3:0, á heimavelli. Frank Lampard gerði tvö markanna. Arsenal situr eftir í þriðja sæti eftir 0:0-jafntefli gegn Aston Villa á útivelli.

FLORENT Malouda skoraði fyrsta mark Chelsea með skalla strax á sjöttu mínútu og Lampard bætti við tveimur mörkum. Birmingham hafði ekki tapað í síðustu 15 leikjum.

Fyrra mark Lampards var úr skoti af um 20 metra færi á 32. mínútu og síðara markið skoraði enski landsliðsmaðurinn af stuttu færi rétt fyrir leikslok, eftir sendingu frá Malouda.

Stöngin út hjá Arsenal

Það var mikið í húfi í Birmingham þar sem Aston Villa tók á móti Arsenal. Leiknum lauk með markalausu jafntefli en það gekk ýmislegt á í leiknum. Thomas Vermaelen, varnarmaður Arsenal, fór meiddur af velli þegar 35 mínútur voru liðnar og kom Sol Campbell inn á í hans stað. Spánverjinn Cesc Fabregas var nálægt því að koma Arsenal yfir undir lok fyrri hálfleiks þar sem hann átti hörkuskot í stöngina á marki Villa. Þegar fimmtán mínútur voru liðnar af síðari hálfleik þrumaði Tomás Rosický boltanum í þverslá Villa-marksins og niður úr dauðafæri.

Góður sigur Everton

Everton náði dýrmætum þremur stigum með 2:0-sigri gegn Sunderland á heimavelli. Ástralinn Tim Cahill skoraði fyrsta mark leiksins á 7. mínútu með skalla eftir fyrirgjöf frá Marouane Fellaini.

Rétt um tíu mínútum síðar skoraði bandaríski landsliðsmaðurinn Landon Donovan fyrir Everton.

Glæsimark Pedersen

Norðmaðurinn Morten Gamst Pedersen skoraði fyrra mark Blackburn í 2:1-sigri liðsins gegn Wigan. Markið skoraði hann með glæsilegu skoti utan vítateigs á 20. mínútu. Gary Caldwell jafnaði fyrir Wigan, 1:1, með skalla á 60. mínútu eftir fyrirgjöf frá James McCarthy. Nikola Kalinic tryggði Blackburn 2:1-sigur með skalla eftir hornspyrnu á 83. mínútu.