3. maí 2011 | Innlendar fréttir | 933 orð | 5 myndir

Ekki eftir neinu að bíða

• Opnunartónleikar Hörpu fara fram á morgun • Opin æfing Sinfóníuhljómsveitarinnar fyrir helgi gaf góð fyrirheit

Langur kafli senn á enda Iðnaðarmenn munu brátt kveðja tónlistarhúsið við höfnina. Alls hafa um þúsund manns komið að framkvæmdinni, með einum eða öðrum hætti.
Langur kafli senn á enda Iðnaðarmenn munu brátt kveðja tónlistarhúsið við höfnina. Alls hafa um þúsund manns komið að framkvæmdinni, með einum eða öðrum hætti. — Morgunblaðið/Ómar
[ Smellið til að sjá stærri mynd ]
Baksvið Gísli Baldur Gíslason gislibaldur@mbl.is Komið er á endasprett í byggingu Hörpu við hafnarbakkann. Það fer ekki á milli mála þegar litið er inn fyrir dyr tónlistarhússins.
Baksvið

Gísli Baldur Gíslason

gislibaldur@mbl.is

Komið er á endasprett í byggingu Hörpu við hafnarbakkann. Það fer ekki á milli mála þegar litið er inn fyrir dyr tónlistarhússins. Iðnaðarmenn keppa við tímann sem aldrei fyrr og reyna að leggja lokahönd á verkið. Steypan verður vart þornuð þegar fyrstu tónleikagestir Hörpu munu ganga inn í nýja húsið á miðvikudagskvöld og hlýða á Sinfóníuhljómsveit Íslands spila undir stjórn Vladimírs Ashkenazy.

Steinunn Birna Ragnarsdóttir, tónlistarstjóri Hörpu, segir að ekkert muni vanta upp á það að upplifunin geti orðið fullkomin fyrir fyrstu tónleikagestina á morgun, þrátt fyrir að húsið verði ekki fullkomlega klárað. Hún segir að opin æfing Sinfóníunnar á föstudaginn, sem var haldin fyrir starfsmenn hússins, hafi gefið góð fyrirheit.

Opnunartímabil hefst á morgun

„Það verður ýmislegt óklárað, enda vissum við það frá byrjun og lögðum áherslu á það að salirnir yrðu til og allt sem skiptir máli til að halda viðburði. Og við það stöndum við. Þó það verði kannski eitt og annað smálegt eftir þá veit ég að fólk verður svo glatt yfir því að koma að það tekur ekkert eftir því,“ segir Steinunn Birna. Opnunartímabil Hörpu mun standa frá morgundeginum allt til 20. ágúst. Á þeim tíma mun húsið klárast í þrepum.

„Við tókum meðvitaða ákvörðun um það þegar við vissum að það yrði ekki allt tilbúið 4. maí að byrja samt, af því að húsið yrði tilbúið til að standa undir því að hýsa viðburði. Okkur fannst það miklu skynsamlegra heldur en að láta húsið bíða eftir að allt yrði tilbúið utanhúss, að fara samt með það í gang, því þetta er langþráð hús, líklega langþráðasta tónlistarhús heims, þori ég að fullyrða, og það er ekki eftir neinu að bíða.“

Steinunn Birna segir að hátt í þúsund manns hafi starfað við húsið, þegar allt er tekið saman. Hún segir að starfsmenn séu samhentir og samstilltir á það að láta verkefnið verða farsælt og takast vel.

„Við erum að horfa á hluti gerast sem ég hélt að væru ekki mögulegir. Á föstudag horfðum við á anddyrið hreinsast upp og nánast verða almennilegt, þó auðvitað eigi eftir að hreinsa og fínísera mjög margt. Hér er búin að eiga sér stað svo mikil vinna og hún safnar ryki og alls konar hlutum sem tekur tíma að losna við, þannig að það verður ekki allt spikk og span, það vitum við alveg fyrir víst. En þetta verður alla vega vel í stakk búið til að við getum opnað og gert það glæsilega.“

Fullkomin upplifun

En munu tónleikagestir fá að upplifa húsið í allri sinni dýrð á opnunartónleikunum?

„Ég get fullyrt það, því salurinn er tilbúinn og það er allt til taks. Hér er fyrsta flokks aðstaða, hljómburður, hljóðfæri, tónlistarmenn og hljómsveitarstjóri. Það er ekkert sem vantar upp á að upplifunin geti orðið fullkomin.“

Tónlistarstjórinn segir það forréttindi að fá að standa í stafni fyrir þetta verkefni.

„Tilfinningin er mjög margþætt. Hún er fyrst og fremst alveg ótrúleg gleði yfir því að þetta sé að takast. Hafandi alist upp í tónlistarumhverfi og tekið í arf þörfina fyrir þetta hús og þrána eftir því, þá er það líka fyrir mig, persónulega, stórkostlegt að upplifa þetta. Ég lít á þetta sem langhlaup, þó að þessum áfanga sé náð – að húsið opni – þá er það bara fyrsti þátturinn í langri og vonandi farsælli ævi þessa húss.“

„Stærstu tónleikar sem ég mun nokkurn tímann fá að spila á“

• Víkingur Heiðar leikur á opnunartónleikunum á morgun

Píanóleikarinn Víkingur Heiðar Ólafsson mun spila einleik á opnunartónleikunum í Hörpu á morgun, píanókonsert eftir Grieg. Þegar blaðamaður leit inn í aðalsalinn, Eldborg, sat Víkingur við nýja Steinway-flygilinn og lék listir sínar innan um iðnaðarmennina sem voru að leggja lokahönd á hinn tilkomumikla sal. Það hljóta að teljast forréttindi að fá að hlusta á og upplifa spilamennsku Víkings Heiðars í slíku návígi, hvað þá þegar maður er í vinnunni.

Víkingur brá sér frá og ræddi stuttlega við blaðamann á meðan hollenski píanóstillarinn og tæknisérfræðingurinn Michel Brandjes stillti hljóðfærið hans til.

Hvernig líst þér á salinn?

Ég veit ekki alveg hvernig ég á að svara. Stórkostlega. Það er erfitt að finna orð til að lýsa því. Hann virðist vera fullkomlega heppnaður og hljómurinn er alveg guðdómlegur. Stór og mikill og allt um lykjandi, hlýr en samt rosalega raffíneraður. Maður getur bæði spilað hérna, öskrað og líka hvíslað. Ég held þetta hafi heppnast eins vel og hægt var að óska sér.

Hvernig gengur undirbúningurinn?

Bara rosavel. Það eru tveir dagar í stóru stundina. Það er svolítið óraunverulegt að vera hérna núna, partur af þessu. Ég er búinn að vera hérna í fjóra, fimm daga og sjá hvað það er allt klikkað. Það eru allir einhvern veginn komnir yfir sín orkuþolmörk. Þannig að nú eru menn að keyra á einhverri aukaorku og allir að vinna að sama marki. Það er rosa-mikil spenna og rosa-mikil stemning. En það er líka ákveðið brjálæði. Þannig að ég reyni að loka mig af og vera svolítið einn, reyni að finna einhvers konar kjarna svo ég geti einbeitt mér fyrir þetta. En jú, frábær stemning.

Er mikið stress?

Já, þetta eru stærstu tónleikar sem ég mun nokkurn tímann fá að spila á. Því það er ekkert stærra en að halda fyrstu tónleikana í tónlistarhúsi sem er búið að bíða eftir og berjast fyrir í hundrað ár. Það er ótrúlega mikið á bakvið þessa stund. Þetta er stress, þetta er spenna. En þetta er fyrst og fremst gaman. Það er kannski best að hugsa ekkert svo mikið um þetta í þessu samhengi fyrr en eftir á, heldur nálgast þetta bara eins og venjulega tónleika. Annars held ég maður fari bara yfir um. gislibaldur@mbl.is

Skannaðu kóðann til að sjá myndskeið úr Hörpu.
mbl.is

Aðgangsupplýsingar

Notandi:Þú ert ekki innskráð(ur).
Greinin: Þessi grein er ókeypis þar sem hún er eldri en þriggja ára.
Morgunblaðið - fyrsta forsíðan

Morgunblaðið hjá Landsbókasafni

Á vefnum timarit.is er að finna stafrænt safn Landsbókasafns yfir helstu dagblöð og tímarit landsins. Þetta er eina leiðin til að leita að efni úr Morgunblaðinu frá því fyrir 1986.