Ryan Giggs getur orðið Englandsmeistari í þrettánda sinn á þessu vori.
Ryan Giggs getur orðið Englandsmeistari í þrettánda sinn á þessu vori. — Reuters
[ Smellið til að sjá stærri mynd ]
Synd væri að segja að óvænt staða væri komin upp í ensku úrvalsdeildinni í knattspyrnu. Nú þegar páskaleikirnir fara í hönd hefur gamall kunningi, Manchester United, komið sér makindalega fyrir á toppnum – og sýnir ekki á sér neitt fararsnið.

Synd væri að segja að óvænt staða væri komin upp í ensku úrvalsdeildinni í knattspyrnu. Nú þegar páskaleikirnir fara í hönd hefur gamall kunningi, Manchester United, komið sér makindalega fyrir á toppnum – og sýnir ekki á sér neitt fararsnið.

Í allan vetur hefur „háværi nágranninn“, Manchester City, farið mikinn og eftir að hann kjöldró Rauðu djöflana á þeirra eigin heimavelli fyrr í vetur, 6:1, héldu sumir að tími hins nýríka félags, sem lengi hefur bærst í skugga „stóra bróður“, væri loksins kominn. City hampaði Englandsbikarnum síðast árið 1968.

Jafnt og þétt hefur dregið af þeim heiðbláu á umliðnum vikum en þar til í síðustu umferð hafði City örlögin eigi að síður enn í hendi sér. Eftir óvænt jafntefli gegn endurlífguðu liði Sunderland, þar sem City skoraði í tvígang á lokamínútunum, er United hins vegar formlega komið með frumkvæðið. Toppliðin eiga að vísu eftir að kljást innbyrðis en þar sem fimm stigum munar nú á þeim nægir City ekki að vinna þann leik. United þarf að misstíga sig í fleiri leikjum.

Ekki strembið prógramm

Erfitt er að sjá það gerast, hinir sex leikirnir sem meistararnir eiga eftir eru gegn QPR (h), Wigan (ú), Aston Villa (h), Everton (h), Swansea (h) og Sunderland (ú). Þetta er ekki strembið prógramm, nema þá helst síðasti leikurinn. Mögulega verður bikarinn þá þegar kominn í hús. Við skulum heldur ekki útiloka að Gylfi Sigurðsson komi til með að vilja sýna „tilvonandi félögum sínum“ hvar Davíð keypti ölið!

Manchester United steinlá fyrir Newcastle United í fyrsta leik ársins 2012 en síðan hefur liðið fengið 31 af 33 stigum sem hafa verið í boði. Eina jafnteflið kom gegn Chelsea á Brúnni, þar sem þeir Fergusynir lentu 3:0 undir. Sumsé ígildi sigurs.

Það er gömul saga og ný að United-liðið sé aldrei sterkara en á lokasprettinum og það ætlar að koma á daginn enn eitt árið. Leikmennirnir þekkja, flestir hverjir, toppbaráttuna eins og lófann á sér meðan City-menn eru, þrátt fyrir alla sína hæfileika, nýgræðingar á því sviði. Það hefur sýnt sig í síðustu leikjum, pressan hefur náð í skottið á þeim – og rígheldur í það.

Svona til að taka glímuskjálftann úr nýliðum eins og Ashley Young, Phil Jones og David de Gea kallaði Sir Alex Ferguson á Paul gamla Scholes, sem var hvort eð er með annan fótinn á æfingasvæðinu. Við það rann fyrrgreint æði á liðið. Hvort það hefur endilega eitthvað með Scholes að gera er önnur saga en ljóst má vera að gamli maðurinn hefur örugglega ekki skemmt fyrir.

Oft hafa línur í ensku knattspyrnunni skýrst yfir páskana og úr því sem komið er þarf City nær örugglega að vinna alla leiki sína sjö. Það verkefni hefst á Emirates-leikvanginum í Lundúnum á páskadag, þar sem Arsenal tekur á móti þeim heiðbláu. Lúti City í gras þar og vinni United QPR í dag, laugardag, er óhætt að fullyrða að glímunni sé lokið með klofbragði. Það hefur Roberto Mancini, knattspyrnustjóri City, sjálfur viðurkennt. Þá yrði munurinn orðinn átta stig.

Gyrði City sig á hinn bóginn í brók og vinni Arsenal gæti það orðið upphafið að æsilegum endaspretti í ensku úrvalsdeildinni

Lundúnaliðin kljást um meistaradeildarsæti

Langur vegur er niður í næstu lið í úrvalsdeildinni, Arsenal og Tottenham Hotspur hafa 58 stig (átján stigum minna en United og 13 stigum minna en City) og Chelsea og Newcastle United 53 stig (leik Swansea og Newcastle var ekki lokið á föstudeginum langa þegar Sunnudagsmogginn fór í prentun).

Aðeins tvö af þessum liðum koma til með að tryggja sér þátttökurétt í Meistaradeild Evrópu á næstu leiktíð og því verður allt lagt í sölurnar í lokaumferðunum. Baráttan um meistaradeildarsæti hefur sett skemmtilegan svip á hinar stærri deildir álfunnar undanfarin ár og barið félög áfram enda þótt sjálfur meistaratitilinn sé úr augsýn.

Á botninum er útlitið svart hjá Úlfunum en Wigan Athletic, Blackburn Rovers, QPR og Bolton Wanderers eru einnig í bullandi fallhættu.

Þrjú félög hafa borist á banaspjót á toppi b-deildarinnar í Englandi að undanförnu og eins og staðan er nú eru Southampton og Reading líklegust til að fara beint upp. West Ham bíður líklega það hlutskipti að fara í umspil. Fimm félög berjast um hin umspilssætin þrjú, Birmingham, Blackpool, Brighton, Middlesbrough og Cardiff.

Fellur stigametið?

Manchester United hefur nú 76 stig á toppi úrvalsdeildarinnar. 21 stig er ennþá í pottinum, þannig að liðið gæti mest náð 97 stigum. Það yrði nýtt stigamet í Englandi en Chelsea á það frá árinu 2005, 95 stig. United hefur mest fengið 92 stig, 1993-94, en þá voru leikirnir 42 en ekki 38 eins og nú.