Umferð Bílar á Vesturlandsvegi á leið frá Reykjavík.
Umferð Bílar á Vesturlandsvegi á leið frá Reykjavík. — Morgunblaðið/Ómar
Á fundi bæjarráðs Akraness í vikunni var samþykkt bókun þar sem skorað er á samgönguyfirvöld, að forgangsraða fjárveitingum í þágu umferðaröryggis og hefja nú þegar breikkun á Vesturlandsvegi.

Á fundi bæjarráðs Akraness í vikunni var samþykkt bókun þar sem skorað er á samgönguyfirvöld, að forgangsraða fjárveitingum í þágu umferðaröryggis og hefja nú þegar breikkun á Vesturlandsvegi.

Bæjarráðið fjallaði um skýrslu Vífils Karlssonar hagfræðings um ástand vega á Vesturlandi. Í skýrslunni, sem var unnin fyrir samtök sveitarfélaga á Vesturlandi, kemur fram að fjárveiting til Vesturlandsvegar nemur um helmingi af fjárveitingu til Reykjanesbrautar á 10 ára tímabili, eða á árunum 2005 til 2014.

Í bókun bæjarráðsins segir, að nýjustu tölur frá Vegagerðinni sýni mikla aukningu umferðar á milli ára á flestum vegum landsins. Aukningin sé hvað mest á Vesturlandi en umferð um Hvalfjarðargöng hafi aukist um 21% á fyrstu 5 mánuðum ársins miðað við sama tímabil ársins 2015. Þannig hafi tæplega 8 þúsund bílar farið í gegnum göngin daglega í júní.

Í yfirliti Vífils kemur fram að útgjöld til Vesturlandsvegar séu um helmingi lægri en til Reykjanesbrautar á tímabilinu frá 2005 til 2014 og um 15% lægri en til Suðurlandsvegar. Í gildandi samgönguáætlun er gert ráð fyrir því að hefja breikkun Vesturlandsvegar á árunum 2019 til 2022.

„Að mati bæjarráðs á Akranesi er verkefnið svo brýnt að flýta verður framkvæmdum eins og kostur er. Það er með öllu óviðunandi að árið 2016 sé enn verið að keyra einbreiðan Vesturlandsveg og að sú verði raunin næsta áratug eða svo,“ segir m.a. í bókuninni.