Flytja inn rafdrifin vinnuhjól frá Kína

Sigurður Ægisson

Siglufirði

Siglfirðingurinn Valgeir Tómas Sigurðsson, fyrrverandi veitingamaður í Lúxemborg, sem m.a. rekur nú Harbour House Café á Siglufirði, með Jónasi bróður sínum, og Siglo Harbour Hostel, hefur undanfarið, ásamt Hilmari syni sínum, verið að flytja inn rafdrifin vinnuhjól frá Shenzhen í Kína, lítilli borg rétt norðan við Hong Kong.

„Þetta byrjaði þannig að ég fór nokkrum sinnum þangað austur árið 2009, til að reyna að selja Kínverjum Black Death-bjórinn minn, sem Vífilfell Víking bruggar á Akureyri, en það tókst ekki,“ segir Valgeir, aðspurður um upphafið að þessum innflutningi. „Á þessum ferðum mínum sá ég hins vegar þessi sniðugu þríhjól, bókstaflega í öllum borgum, úti um allt og í miklu magni, notuð bæði sem vöruflutningahjól og farþegahjól, maður sá heilu fjölskyldurnar á þessum farartækjum. Ég hafði verið sendill í kjötbúðinni á Siglufirði sem ungur drengur og fór þá um á reiðhjóli, t.d. með kostinn í skipin, og hugsaði með mér, þegar ég sá þetta ytra, að það hefði nú ekki verið ónýtt að vera á svona hjóli í gamla daga, og sá í hendi minni að þetta gæti hentað í allt mögulegt uppi á Fróni. Ég setti mig því í samband við framleiðendurna og heimsótti verksmiðjuna sem framleiðir þessi hjól og það var auðsótt að fá þau keypt og flutt til Íslands. Ég er sá fyrsti í Evrópu, sögðu þeir, sem kaupir þetta. Fyrsta hjólasendingin kom fyrir rúmu ári. Þetta kemur hingað í einingum og er sett saman hérna á Siglufirði. Og til að auðvelda fólki að skoða vöruna höldum við úti vefsíðunni vinnuhjol.is.“

Að sögn Valgeirs eru hjólin eins og hver önnur rafskutla, þarfnast hvorki skráningar né ökuprófs, og hægt er að keyra 100 km á hleðslunni við bestu aðstæður. Þau eru svo hlaðin með venjulegri 220V-innstungu.

Hentar til alls kyns brúks

„Ég er að vonast til að þessi hjól geti náð útbreiðslu hér, því þau hafa reynst okkur mjög vel. Við erum að selja þetta út um allt land, erum með aðstöðuna á Siglufirði og flytjum þetta án gjalds hvert á land sem er. Þetta er mjög einföld smíð, mjög auðvelt að komast að öllum hlutum, og á ekki að geta bilað mikið, en ef það gerist er hægt að fá alla varahluti og aðstoð hjá okkur. Dýrasta hjólið, sem jafnframt er stærst, er á 560.000 krónur, en það minnsta á 250.000 krónur. Ég sé fyrir mér að það væri mikill akkur fyrir sveitarfélög að fá sér svona hjól, því það er hægt að láta unglinga vera á þeim í alls kyns snatti, við að hreinsa tjaldstæði eða losa rusladalla eða mála eða hvað sem er. Þau henta vel til flutninga á varningi allt að hálfu tonni. Ég hef verið að selja þetta til bakara, bænda, málara, pípulagningamanna, trillusjómanna og fleiri. Eitt er á Akureyrarflugvelli, hjá Norlandair, notað til þess að ferja farangurinn úr flugvélunum og í, skátarnir fengu annað á Úlfljótsvatn og þannig mætti lengi telja.“