Á tónleikum Davíð Steingrímsson fylgist vel með Paul McCartney.
Á tónleikum Davíð Steingrímsson fylgist vel með Paul McCartney.
Steinþór Guðbjartsson steinthor@mbl.is Tónlistarmaðurinn Paul McCartney fer í tónleikaför til Ameríku í lok mars, byrjar í Chile og endar í Los Angeles 13. júlí.

Steinþór Guðbjartsson

steinthor@mbl.is

Tónlistarmaðurinn Paul McCartney fer í tónleikaför til Ameríku í lok mars, byrjar í Chile og endar í Los Angeles 13. júlí. „Ég verð hugsanlega í Bandaríkjunum, þegar tónleikarnir verða þar, og reyni að fá miða á tvenna eða þrenna tónleika en annars bíð ég bara eftir næsta túr í Evrópu,“ segir Davíð Steingrímsson, sem hefur farið á 52 tónleika með goðinu, síðast í Glasgow í Skotlandi 13. desember síðastliðinn.

„Áhuginn á Bítlunum er meðfæddur og sérstaklega á Paul,“ heldur Davíð áfram. Hann segir að þegar hann hafi verið sjö ára hafi hann farið akandi með föður sínum norður í land. „Hann spilaði Venus and Mars , nýútkomna plötu með Wings, alla leiðina fram og til baka og eftir það varð ekki aftur snúið. Ég féll algerlega fyrir hljómsveitinni og Paul, byrjaði að kaupa plöturnar og smátt og smátt tengdist ég Bítlunum.“

Áhugi Davíðs á tónlist Pauls hefur haldist óslitinn frá 1975. Hann segist alltaf bíða spenntur eftir hverri nýrri plötu enda leggi maðurinn sig alltaf vel fram. „Til að byrja með var „Let It Be“ lagið en sennilega er „Maybe I'm Amazed“ besta tónleikalagið hans.“

Fyrst í Bandaríkjunum

Davíð, sem rak skemmtistaðinn Obladi Oblada á Frakkastíg en er nú með bar á Benidorm á Spáni, fór fyrst á tónleika með Paul McCartney í Staples Center í Los Angeles 2002. „Ég hafði búið í Bandaríkjunum í nokkur ár og unnið við golfkennslu og fleira, en áður en við fluttum heim fór ég á þessa tónleika og hvílík upplifun! Þetta var miklu meira en ég hafði búist við og því hélt ég áfram að sækja tónleika með Paul.“

Ekki leið á löngu þar til Davíð komst nánast í snertingu við tónlistarmanninn frá Liverpool. „Ég var fremst við sviðið á Parken í Kaupmannahöfn 2003 og sá engan annan en hann með 50.000 manns fyrir aftan mig. Tveimur dögum seinna voru aðrir tónleikar í Globen í Stokkhólmi, ég sat framarlega og eftir tvö eða þrjú lög gaf hann sér tíma til þess að heilsa mér. Eftir það hef ég gætt þess að vera alltaf fremstur og hann heilsar mér í hvert sinn sem hann gengur inn á sviðið.“

Á tónleikum 2004 fékk Davíð eiginhandaráritun frá listamanninum. „Hann gaf eina eiginhandaráritun og ég fékk hana,“ segir hann stoltur. Bætir við að hann hafi líka fengið Paul til þess að syngja óskalag, „Ram On“, á tónleikum í Antwerpen 2012. „Hann er ekki vanur að flytja óskalög en sagðist gera það fyrir mig.“

Davíð hefur einu sinni hitt Paul McCartney. „Ég var á gangi rétt hjá heimili hans í London, þegar ég mætti honum með syni sínum. Ég heilsaði honum og fékk að faðma hann, en vildi ekki vera uppáþrengjandi.“