Minning: Guðlaugur Davíðsson múrarameistari Fæddur 23. desember 1909 Dáinn 27. október 1986 Mig langar til þess að minnast frænda míns góða, Guðlaugs. Hann var bróðir föður míns Marteins. Frændi minn heitinn fæddist á Hlemmiskeiði á Skeiðum í Árnessýslu. Hann var sonur hjónanna Mörtu Gestsdóttur og Davíðs Jónssonar. Móðir Guðlaugs lést árið 1914, árið sem faðir minn fæddist.

Guðlaugur fór víða um sveitir á sínum unglingsárum, og vann þá við hin ýmsu störf eins og tíðkaðist oft í þá daga. Síðar vann hann mikið með föður sínum við múrverk. Guðlaugur eignaðist tvö börn, Martein og síðar Ingibjörgu með Ágústu Guðmundsdóttur, er hann bjó með til fjölda ára. Ingibjörg lést af slysförum fyrir nokkrum árum. Ágústa kona Guðlaugs átti sex börn og eru fjögur þeirra á lífi.

Davíð faðir Guðlaugs kvæntist aftur Maríu Magnúsdóttur og eignuðust þau eina dóttur, Aldísi.

Guðlaugur var listrænn maður, enda átti hann ekki langt að sækja það frá föðurfólki sínu. Hann fékk tilsögn í nokkra tíma hjá Ríkharði Jónssyni listamanni, þá aðallega við blýantsteikningar sem hann teiknaði sér til skemmtunar og lýstu myndir hans miklu hugmyndaflugi.

Guðlaugur var þúsundþjalasmiður, eins og þeir menn nefnast, sem allt leikur í höndunum á.

Í minningargreinum er oft látið sem að viðkomandi hafi verið gallalaus, en það veit ég að við kynni mín við Guðlaug frænda var hann ávallt glaðvær og kvartaði aldrei, þótt lífið hafi ekki alltaf verið dans á rósum. Hann var nægjusamur, sá vel fyrir sínum nánustu og bar hag þeirra ávallt fyrir brjósti.

Slíkar persónur sem frændi var fyrirhitta fáir í dag.

Þegar ég og frændi hittumst, naut ég þess að heyra hann segja frá lífinu, einsog það var á þeim árum er hann var að alast upp. Kunni hann frá mörgu skemmtilegu og fróðlegu að segja.

Er Guðlaugur kom á heimili fjölskyldu minnar þó að á þungbúnum degi væri, var eins og sólin skini, þvílíka birtu og hlýju bar hann meðsér hvar sem hann kom.

Ég vil þakka frænda góðu stundirnar.

Ég votta aðstandendum samúð mína.

Hvíli Guðlaugur í friði og friður Guðs hann blessi.

"Trúarinnar traust og styrkur

tendrar von í döpru hjarta.

Eilífðin er ekki myrkur,

eilífðin er ljósið bjarta."

(H. Sæmundsson)

Marta Br. Marteinsdóttir