Hann er aðeins þrítugur að aldri en hefur samt sem áður náð að leika með nokkrum af stærstu knattspyrnuliðum Evrópu. Faðir hans þótti frábær afreksmaður á sinni tíð og eldri bróðir hans er einnig goðsögn í lifanda lífi. Hann er danskur, heitir Brian Laudrup og gekk til liðs við Lundúnaliðið Chelsea nú í sumar.


KNATTSPYRNA Danski landsliðsmaðurinn Brian Laudrup heldur uppi heiðri fjölskyldunnar

Skyrtan gerði útslagið

Hann er aðeins þrítugur að aldri en hefur samt sem áður náð að leika með nokkrum af stærstu knattspyrnuliðum Evrópu. Faðir hans þótti frábær afreksmaður á sinni tíð og eldri bróðir hans er einnig goðsögn í lifanda lífi. Hann er danskur, heitir Brian Laudrup og gekk til liðs við Lundúnaliðið Chelsea nú í sumar.

Brian Laudrup er hlédrægur maður sem fremur tjáir sig á knattspyrnuvellinum en í fjölmiðlum. Þannig hefur hann eftir megni reynt að forðast kastljós fjölmiðlanna, en seint verður þó sagt að brotthvarf hans á vormánuðum frá skoska stórliðinu Rangers í Glasgow hafi gengið átakalaust fyrir sig.

Í Skotlandi hafði hann leikið um þriggja ára skeið og átt einna stærstan þátt í meistaratitli félagsins tvö fyrstu árin, m.a. verið útnefndur leikmaður ársins. Samningur hans var að renna út og honum frjálst að yfirgefa herbúðir liðsins án nokkurra eftirmála. Reyndin varð þó ekki svo einföld og í hönd fór erfiður tími; enska stórliðið Chelsea undir stjórn Hollendingsins Ruuds Gullits bar víurnar í Danann snjalla og hið sama gerðu hollensku meistararnir í Ajax, en með þeim leikur einmitt eldri bróðir hans, Michael. Bæði lið töldu sig eiga góða möguleika, ekki síst hollenska liðið sem kvaðst hafa munnlegt samþykki leikmannsins. Hjá Chelsea var staðan öllu óljósari ­ Gianluca Vialli, leikmaður liðsins, hafði milligöngu um fund með Laudrup í umboði félagsins, sem á sama tíma stóð fyrir uppsögn Gullits og óvæntum samningi við Vialli um stöðu knattspyrnustjóra í kjölfarið. Inn í þau leiðindamál blandaðist Brian og stóru orðin voru síst spöruð. Ekki bættu fullyrðingar Ajax úr skák og loks kastaði tólfunum er forráðamenn Rangers kúventu í afstöðu sinni og kröfðust hárrar greiðslu fyrir leikmanninn, sem samkvæmt samningum átti að vera laus allra mála.

Í kjölfarið fylgdu hártoganir á laganna bókstaf, menn greindi á um hvort flutningur leikmanns frá Skotlandi til Englands heyrði til innanlands- eða milliríkjaviðskipta. Loks fóru þó málin að skýrast; Chelsea hótaði að draga Rangers fyrir Evrópudómstólinn og féllu þá Skotarnir frá kröfum sínum. Hið sama gerðu forráðamenn Ajax eftir að Brian bað þá afsökunar, á því sem hann kallaði ótímabærar yfirlýsingar, og því var komið grænt ljós á flutning til Vestur-Lundúna.

Útslagið gerði þó þegar Colin Hutchison, stjórnarmaður í Chelsea, mætti á einn samningafundinn, opnaði skjalatösku sína og tók út bláa skyrtu liðsins og afhenti hana Brian. Aftan á henni var ritað Nikolai - nafn sonar leikmannsins. Ekki spillti svo fyrir að launin voru ekkert til að fúlsa við og þar komust fjölmiðlar í feitt ­ vikukaup hans er áætlað á bilinu sex til níu milljónir íslenskra króna. Ýmsir urðu til að býsnast yfir svo fáheyrðum launagreiðslum og í kjölfarið óx þeim ásmegin er töldu of mikla aukningu í fjölda erlendra leikmanna í ensku knattspyrnunni.

Það var því ljóst, að hinn hógværi og allt að því feimni Laudrup naut óskiptrar athygli hvar sem hann kom að málum. "Slíkt er mér ekki að skapi," sagði hann í félagsskrá Chelsea fyrir skemmstu, aðspurður um fárið í kringum félagaskiptin. "Ég sem hugðist eitt sinn snúa mér að tennis eða skák svo mér væri ekki sífellt líkt við föður minn eða bróður og væri ekki alltaf í sviðsljósinu."

Sífelldur samanburður

Það reyndist Brian erfitt að vera í sífellu líkt við þá frægu feðga, Finn og Michael. Finn Laudrup, faðir Brians, var á árum áður sérlega snjall knattspyrnumaður og mikil stjarna í heimalandinu. Hann var á sínum tíma fyrirliði danska landsliðsins og tók m.a. þátt í þeim fræga leik, Danmörk ­ Ísland, á Idrætsparken í Kaupmannahöfn 1967 sem lyktaði 14:2. Eldri soninn, Michael, þarf vart að kynna, og víst er að hann bar hróður fjölskyldunnar enn víðar með stórliðum á borð við Juventus, Barcelona, Real Madrid og síðast Ajax. Síðast gafst okkur Íslendingum tækifæri nú í sumar til að fylgjast með listfengi hans og leikni með knöttinn er hann lék með Dönum á HM í Frakklandi. Þar lék hann einmitt við hlið yngri bróður síns, sem smám saman færði sig úr skugganum og skóp sitt eigið orðspor sem einn snjallasti leikmaður samtímans.

Brian Laudrup hóf feril sinn hjá danska liðinu Bröndby og naut þar jafnan óskiptrar athygli fjölmiðla, fyrst sökum ættarnafnsins en seinna vegna eigin verðleika. Hæfileikar hans þóttu nefnilega miklir og þeir lágu ekki síst í boltameðferðinni sem var einstök. Sá hæfileiki hefur fylgt honum æ síðan.

Frá Bröndby hélt Brian til Þýskalands, fyrst til Bayer Uerdingen og síðan til Bayern M¨unchen. Hjá báðum liðum komu ótvíræðir hæfileikar hans í ljós og fræg eru þau ummæli stjóra Leverkusen á sínum tíma, að Brian væri því miður alltof góður leikmaður fyrir þetta lið. Daninn ungi var orðinn frábær leikmaður á alþjóðlegan mælikvarða, vissulega stóð hann enn í skugga eldri bróður síns, en leiðin virtist greið og framtíðin björt. Næsti áfangastaður var í samræmi við það ­ Ítalía.

Vonbrigði og sigur

Brian Laudrup var leikmaður Fiorentina frá Flórens keppnistímabilið 1992­3 og komst lítt áleiðis í ákaflega varnarsinnaðri knattspyrnu heimamanna. Ekki bætti úr skák að kastljós þarlendra fjölmiðla hvíldi stöðugt á leikmönnum liðsins og það átti sem fyrr ekki við pilt. Hann fluttist því næst um set til risaliðs AC frá Mílanó og þar var hið sama uppi á teningnum, Brian fékk fá tækifæri, enda liðið með sannkallaða úrvalssveit og náði ekki nema níu leikjum á leiktíðinni. Það var því ljóst að framtíðin lá ekki hjá því félaginu og því var hann seldur til skosku meistaranna í Glasgow Rangers. Þetta þótti ekki stórt skref upp á við, en menn töldu orðið ljóst að lengra kæmist Brian ekki og hann myndi aldrei njóta samanburðarins við eldri bróðurinn Michael.

Þar reyndust menn ekki alveg sannspáir. Vissulega er skoska úrvalsdeildin ekkert í líkingu við þá ítölsku, en í Skotlandi naut Brian þess að vera laus við ágang ítölsku pressunnar og hann fór aftur að njóta sín sem knattspyrnumaður. Hróður hans tók aftur að berast um Evrópu og áhrif hans á leikstíl liðsins voru augljós. Hann var valinn leikmaður ársins og vann til allra mögulegra titla með liðinu og þess vegna segir hann að tími hafi verið kominn á breytingar.

"Vissulega eru meiri peningar í ensku knattspyrnunni en þeirri skosku og fleiri lið eru sterk á alþjóðlegan mælikvarða," segir hann. "Vissulega voru leikirnir erfiðir í Skotlandi, en samt voru sum lið þar miklu sterkari en önnur og krafan hjá okkur snerist um stóra sigra. Ég er í knattspyrnu til að vinna til metorða og við unnum allt sem er í boði þar. Enska knattspyrnan hentar mér vel og staðreyndin er sú að Chelsea hefur ekki unnið meistaratitilinn síðan 1955. Liðið er Evrópumeistari bikarhafa, handhafi deildarbikarsins og Meistari meistaranna í Evrópu. Hjá liðinu eru firnasterkir leikmenn víðs vegar að úr Evrópu og margir þeirra eru margfaldir sigurvegarar með öðrum liðum. Fyrir metnaðarfullan leikmann er vart hægt að hugsa sér það betra."

Fast sæti í liðinu?

Fyrstu leikir Chelsea á leiktíðinni hafa gengið upp og ofan, en ljóst er að liðið styrkist með hverjum leiknum. Eins og venjulega standa þó deilur um val framkvæmdastjórans á byrjunarliðinu hverju sinni. Þar hafa fáir átt öruggt sæti og mannvalið er geypilegt.

Af því hefur Laudrup sjálfur þegar þurft að súpa og hann fékk lítið að spreyta sig í byrjun, en í síðustu leikjum hefur komið betur í ljós hvaða hlutverk Laudrup er ætlað að inna af hendi í liðinu. Spá menn því nú að leikstíll Chelsea muni einkum byggjast upp í kringum hann.

Maurice Malpas, fyrrverandi leikmaður og þjálfari skoska liðsins Dundee United, hefur reynsluna af því að leika gegn Brian og hann spáir honum miklum frama í ensku knattspyrnunni, enda sé hann magnaður leikmaður. "Hann getur sprett skyndilega úr spori og hraðabreytingarnar eru magnaðar. Hann skiptir sífellt um stefnu án þess að varnarmaðurinn fái við neitt ráðið og þess vegna verða flest lið að láta einn varnarmann taka hann úr umferð. Slíkt gekk stundum í Skotlandi, en ég sé það ekki ganga upp í ensku úrvalsdeildinni, því Brian sækir beint að varnarmönnunum og hefur alltaf þann möguleika að gefa á samherja. Í Chelsea eru þeir ekki beinlínis af verri gerðinni. Hvernig sem fer er því alltaf stórhætta á ferðum," segir hann.

Í fjölþjóðlegum leikmannahópi Chelsea eru margir landsliðsmenn. Brian Laudrup er þó ekki einn þeirra, því hann kvaddi landsliðið með snilldarframmistöðu á HM í sumar og segist nú vilja einbeita sér að félagsliðinu og fjölskyldunni. "Ég hef orðið Evrópumeistari með danska landsliðinu og það tók öllum væntingum fram. Svo vorum við næstum búnir að slá Brasilíu út úr fjórðungsúrslitunum á HM og því kveð ég sáttur."

Reuters BRIAN Laudrup í baráttu við Jamie Redknapp, leikmann Liverpool. Eftir

Björn Inga

Hrafnsson