DÓMSMÁLANEFND fulltrúadeildar Bandaríkjaþings kom saman til fundar 31. janúar árið 1974 og samþykkti þá einróma að leggja til við deildina, að hafin yrði rannsókn á því hvort rétt væri að ákæra Richard M. Nixon, forseta Bandaríkjanna, vegna Watergate-málsins með það fyrir augum að svipta hann embætti.
Watergate-málið 1974 - Kynlífsmál Clintons 1998

Fylkingarnar hafa

haft hlutverkaskipti

DÓMSMÁLANEFND fulltrúadeildar Bandaríkjaþings kom saman til fundar 31. janúar árið 1974 og samþykkti þá einróma að leggja til við deildina, að hafin yrði rannsókn á því hvort rétt væri að ákæra Richard M. Nixon, forseta Bandaríkjanna, vegna Watergate-málsins með það fyrir augum að svipta hann embætti. Í annað sinn á þessari öld komst dómsmálanefndin að svipaðri niðurstöðu á fundi sínum í fyrradag en að þessu sinni vegna þeirra saka, sem bornar hafa verið á Bill Clinton.

Þessum tveimur málum, Watergate-málinu og kynlífsmálum Clintons, er oft jafnað saman en það er margt, sem greinir þau að. Tilefnið er að sjálfsögðu gjörólíkt og afstaða þingmanna 1974 fór ekki jafn nákvæmlega eftir flokkslínum og hún gerir nú. Á þessum tíma var Peter Rodino nýtekinn við sem formaður dómsmálanefndarinnar og margir efuðust um, að hann væri fær um að takast á við það erfiða verkefni, sem Watergate-málið var. Hann skilaði því samt vel og Charles Rangel, demókrati frá New York og annar tveggja manna, sem enn eru fulltrúadeildarþingmenn og sátu í dómsmálanefndinni 1974, segir, að nefndarmenn hafi verið "mjög ábyrgir í afstöðu sinni".

Engin samstaða 1974

Charles Wiggins, fyrrverandi þingmaður fyrir repúblikana í Kaliforníu og einn nefndarmanna, er þó ekki sammála því, að einhver "samstaða" hafi verið með þingmönnum flokkanna 1974. Í meginatriðum hafi afstaða þeirra farið eftir flokkslínum en þó ekki með jafn afgerandi hætti og nú.

Auk Rangels er hinn fulltrúadeildarþingmaðurinn John Conyers, demókrati frá Michigan, og hann á raunar enn sæti í dómsmálanefndinni. Þrír nefndarmannanna 1974 fóru síðar í öldungadeildina, demókratinn Paul Sarbanes og repúblikanarnir Trent Lott og William Cohen. Lott er nú leiðtogi repúblikana í öldungadeildinni en Cohen varnarmálaráðherra í stjórn Clintons.

Svipaður rökstuðningur en með öfugum formerkjum

Umræðurnar nú um hugsanlega ákæru á hendur Clinton minna um margt á umræðurnar 1974. Þá sagði Lott, að forseta ætti ekki að víkja úr embætti nema fyrir "mjög alvarleg afbrot, sem gætu reynst hættuleg bandaríska stjórnkerfinu" en ekki fyrir "ótilhlýðilega hegðun". Í síðustu viku sagði hann, að "óviðurkvæmilegt framferði" væri næg ástæða. Conyers vildi 1974, að rannsóknin á Watergate-málinu yrði "umfangsmikil og ótímabundin" en nú vill hann "tímabundna og takmarkaða rannsókn".

Repúblikanar, sem voru í minnihluta á þingi 1974, fengu þá aðeins 12 menn af þeim rúmlega 130, sem unnu að rannsókninni á Watergate- málinu, en demókratar hafa nú þriðjunginn af miklu fámennara starfsliði. Einn af þeim lögfræðingum, sem demókratar fengu til liðs við sig 1974, þá nýkominn úr skóla, var kona að nafni Hillary Rodham, 26 ára gömul. Vann hún mikið að málinu þótt hún kæmi ekki að neinni ákvarðanatöku og ári síðar giftist hún Bill Clinton.

Ekki Watergate - heldur framhjáhald

Stuðningsmenn Clintons benda á, að málið gegn Nixon hafi meðal annars falið í sér misnotkun á bandarísku alríkislögreglunni, FBI, og leyniþjónustunni, CIA,; í því að múta mönnum til að þegja og í ólöglegum innbrotum. Málið gegn Clinton snúist ekki um neitt "Watergate", heldur framhjáhald.

Andstæðingar Clintons segja aftur á móti, að málið snúist um það, að forsetinn hafi logið eiðsvarinn og reynt að hindra framgang réttvísinnar. Fyrir það verði að refsa honum.

Ekki kom til þess, að Bandaríkjaþing greiddi um það atkvæði hvort víkja bæri Nixon því að hann sagði af sér áður. Fyrir utan Watergate- málið og Clinton-málin nú er aðeins um eitt annað slíkt mál að ræða í sögu þingsins. Þar var árið 1868, skömmu eftir að borgarastyrjöldinni í Bandaríkjunum lauk, en þá samþykkti fulltrúadeildin að höfða mál á hendur Andrew Johnson forseta en í öldungadeildinni var það fellt og munaði aðeins einu atkvæði.

(Heimildir: Reuters, The New York Times)

Reuters DÓMSMÁLANEFND fulltrúadeildarinnar á fundi í fyrradag en þá ákvað hún að hefja rannsókn á því hvort ástæða sé til að ákæra Clinton fyrir embættisafglöp. Málverkið til vinstri er af Peter Rodino, formanni nefndarinnar 1974. Hitt er af Henry Hyde, núverandi formanni.



RICHARD Nixon er hann kvaddi Hvíta húsið 9. ágúst 1974, daginn eftir að hann sagði af sér.