Í vikunni var greint frá fyrstu löxunum sem sést hafa í íslenskri laxveiðiá er hópur manna fylgdist með 15 löxum á Stokkhylsbroti og einum í sjónmáli á Brotinu í Norðurá. Á fimmtudag sást svo til laxa í Kvíslafossi að sunnanverðu í Laxá í Kjós. Tveir sáust glöggt, báðir 10-12 pund að mati sjónarvotta, en fylgst var með í kvöldsól og glampa.
Eru þeir að fá 'ann?

Von á góðu

Í vikunni var greint frá fyrstu löxunum sem sést hafa í íslenskri laxveiðiá er hópur manna fylgdist með 15 löxum á Stokkhylsbroti og einum í sjónmáli á Brotinu í Norðurá. Á fimmtudag sást svo til laxa í Kvíslafossi að sunnanverðu í Laxá í Kjós. Tveir sáust glöggt, báðir 10-12 pund að mati sjónarvotta, en fylgst var með í kvöldsól og glampa. Menn héldu að sæist til fleiri laxa, en ekki reyndist unnt að slá því föstu. Þetta er hefðbundinn tími og vert að rifja upp í leiðinni, að meðan enn var veitt í net í Hvítá í Borgarfirði hófst vertíðin jafnan þann 20. maí og alltaf veiddist. Mismikið þó eins og gengur.

Byrjunin lofar sem sagt góðu og því upplagt að rifja upp hvað fiskifræðingarnir hafa látið frá sér fara um væntanlega vertíð. Í stuttu máli þá hafa þeir spáð góðu sumri. Meira verði af tveggja ára laxi í ánum en í fyrra, sé miðað við hlutfall af eins árs fiski í fyrra, en eins og menn muna var gríðarlega mikið af smálaxi í ám á síðasta sumri, sérstaklega á Norðurlandi. Víðast hvar var útganga gönguseiða í mjög góðu lagi og ætti því í ljósi góðs ástands í hafinu að skila sér sem stórar og góðar smálaxagöngur. Það er helst að spurningarmerki hvíli yfir smálaxagöngum á austanverðu Norðurlandi, frá Þingeyjarsýslum og austur í Vopnafjörð. Á þessu svæði var seiðaganga hafin og í góðum gír, er mikið kuldakast skall á um hásumarið. Kuldinn varði nógu lengi til að stöðva að mestu seiðagönguna.

Ekki liggur nógu ljóst fyrir hvað síðar gerðist, en fiskifræðingar hafa látið í ljós ótta um að hluti seiðanna hafi drepist, önnur hafi afráðið að dvelja árinu lengur í ánni og enn önnur hypjað sig út seint og um síðir. Af þessum sökum hafa sérfræðingarnir ekki þorað að spá nema "þokkalegri" smálaxagengd í þessum landshluta. Þeir benda á óvissuþáttinn og minna á að vel geti ræst úr þrátt fyrir allt. Frægt var er þeir spáðu aflabresti í smálaxi á Norðausturhorninu sumarið 1995 þar sem flóð og kuldar voru á svæðinu á aðalgöngutíma gönguseiða. Það kom varla sporður í seiðagildruna í Vesturdalsá og útlitið var ekki gott.

Það sem síðan gerðist var, að stórar smálaxagöngur skiluðu sér og fiskur var vænn og fallegur. Seiðin fóru því út þrátt fyrir allt. Bara seint og síðar meir. Löngu eftir að fiskifræðingarnir voru farnir af vettvangi.

Við þetta má síðan bæta, að vegna hins góða árferðis í hafinu má búast við slatta af tröllum, ekki síst geta menn hugsað sér gott til glóðarinnar eftir að það fréttist að 18 til rúmlega 20 punda laxarnir eru margir hverjir orðnir svo mikilfenglegir eftir aðeins tvö ár í sjó. Áður var það almenn trú veiðimanna að þeir fiskar væru búnir að vera þrjú ár í hafinu.

ÞÓRÐUR Pétursson t.v. og Magnús Jónasson með voðalegan bolta úr Laxá í Aðaldal, 19 punda hæng sem fór í klakið. Mögulega hefur hann aðeins verið tvö ár í sjó.