Tiger Woods með verðlaun sín ásamt móður sinni, Tildu, og unnustu Johanna Jadoga.
Tiger Woods með verðlaun sín ásamt móður sinni, Tildu, og unnustu Johanna Jadoga.
BANDARÍKJAMAÐURINN Tiger Woods sigraði með miklum yfirburðum á 129. Opna breska meistaramótinu. Leikið var á gamla St. Andrews-golfvellinum í Skotlandi og bætti Woods einnig mótsmet Nick Faldos á 72 holum um eitt högg. Tiger Woods lauk leik á 19 höggum undir pari vallarins eða á 269 höggum og var það átta höggum minna en skor þeirra sem næstir komu.

Ernie Els frá Suður-Afríku og Daninn Thomas Björn urðu jafnir í öðru sæti á 277 höggum og er þetta mesti munur á fyrsta og öðru sæti á Opna breska meistaramótinu í 93 ár. Tiger Woods lék hringina fjóra af stakri snilld og fyrir mótið var talið að illræmdar sandglompur St.Andrews-vallar myndu bæta höggum við skor Tigers sem og annarra kylfinga. Það er því ótrúleg staðreynd að Tiger sló aldrei í sandglompu á þeim fjórum dögum sem mótið stóð yfir. "Ég sló fjölmörg högg í sandglompunum á hverjum degi á meðan mótinu stóð, en það var heppilegt að það gerðist aðeins á æfingasvæðinu," sagði Tiger Woods.

Afdrifarík mistök hjá Duval

Á lokadegi mótsins var Tiger með sex högga forystu á næstu kylfinga og til þessa hefur það aldrei gerst að Tiger Woods verði á að missa slíkt forskot niður. Bandaríkjamaðurinn David Duval var ræstur síðastur út á lokadegi mótsins ásamt Woods og var Duval í miklum ham á fyrstu níu holunum sem hann lék á 32 höggum, og var því aðeins þremur höggum á eftir Tiger. Á 10. holu fékk Duval góðan möguleika til að minnka forskotið enn frekar en honum mistókst að setja niður tæplega 4 metra pútt fyrir fugli. Woods sýndi mikinn styrk rétt á eftir þegar hann fékk fugl með því að setja niður pútt af svipuðu færi og jók hann þar með forskotið í fjögur högg. Duval lenti síðan í miklum vandræðum á 17. holu sem hann lék á átta höggum, en Duval þurfti fjórar tilraunir til að komast úr sandgryfjunni frægu við flötina. "Ég ætlaði mér að setja pressu á hann í dag og það tókst að vissu marki, síðan gerði ég afdrifarík mistök á 17. holu og Tiger gerði engin slík mistök," sagði David Duval og lofaði harðri keppni um PGA-meistaratitilinn sem fram fer í næsta mánuði.

Daninn Thomas Björn lék sérlega vel á mótinu ásamt Ernie Els, en þrátt fyrir það var það Bandaríkjamaðurinn Paul Azinger sem stal senunni á lokadegi mótsins er hann lék á fimm höggum undir pari. Azinger greindist með krabbamein fyrir nokkrum árum og virtist ferill hans vera á enda en hann virðist vera á batavegi og endaði í sjöunda sæti á mótinu.

Snurðulaus leikur Woods

Leikur Tiger Woods var næstum snurðulaus þar sem hann hitti 66 flatir af 72 og Tiger hitti einnig brautirnar vel því átta af hverjum tíu upphafshöggum hans á mótinu lentu á braut. Tiger fékk 22 fugla, eða einu höggi undir pari, á hringjunum fjórum og notaði rétt rúmlega 31 pútt að meðaltali á 18 holum. Ernie Els frá Suður-Afríku setti einnig met á St. Andrews en S-Afríkumaðurinn endaði í öðru sæti á þriðja stórmóti sínu í röð, og sex sinnum hefur Els verið næstbestur á mótum þar sem Tiger hefur sigrað. "Við eigum í höggi við næstu stórstjörnu golfíþróttarinnar og það þarf mikið til þess að okkur takist að sigra Tiger, í dag er hann einfaldlega í sérflokki, sagði Ernie Els.

Alla dreymir um sigur á St. Andrews

"Allir góðir kylfingar þurfa að vinna á St. Andrews til að fá viðurkenningu á sínum afrekum," sagði Jack Nicklaus og það tók Tiger aðeins fjögur ár sem atvinnumaður að ná þeim áfanga.

"Þetta er stærsta stundin á ferlinum, St.Andrews er vagga golfíþróttarinnar og hér dreymir alla kylfinga um að vinna. Það er því mjög sérstakt að komast í hóp þeirra sem unnið hafa stórmótin fjögur með sigri hér á Opna breska meistaramótinu," sagði Tiger Woods.

Úrslit/B14

Slær öll met.../B11

Lék á..../B11

Eftir Sigurð Elvar Þórólfsson