MICHAEL Johnson og Maurice Greene neyddust báðir til að hætta keppni á úrtökumóti Bandaríkjanna fyrir Ólympíuleikana í Sydney. Lengi hafði verið beðið eftir rimmu félaganna í 200 m hlaupi. Eftir aðeins um 50 metra hneig Johnson niður með eymsli í lærvöðva. Johnson, hefur ákveðið að hann muni aldrei framar keppa í 200 metra hlaupi. Ákvörðun Johnsons kemur í kjölfar meiðslanna. Hann segist hlakka meira til Ólympíuleikana í Sydney eftir að hafa tekið þessa ákvörðun.

Um 100 metrum aftar hætti Greene keppni með svipuð meiðsl. Hvorugur mun því keppa í 200 m hlaupi á Ólympíuleikunum. Johnson keppir í 400 m hlaupi og 4x400 m boðhlaupi og Greene í 100 m hlaupi og 4x100 m boðhlaupi. Hinn óvænti sigurvegari hlaupsins John Capel hleypur því fyrir hönd Bandaríkjanna á leikunum.

Stacy Dragila sló heimsmetið í stangarstökki kvenna er hún fór yfir 4,63 metra. Hún gerði svo þrjár ágætar atlögur að 4,70 metrum en tókst ekki að fara yfir.

Á möguleika á fimm gullverðlaunum á ÓL

Hlaupadrottningin Marion Jones vann 200 m hlaupið er hún náði besta tíma ársins, 21,94 sekúndum. Þar með á hún möguleika á að hreppa fimm gullverðlaun á Ólympíuleikunum en hún keppir í 100 og 200 m hlaupi ásamt langstökki og 4x100 og 4x200 m boðhlaupum.

Clark fjölskyldan var nokkuð áberandi í 800 m hlaupi á mótinu en Hazel kom fyrst í mark á 1:58,97 mínútum, hársbreidd á undan mágkonu sinni Jearl Miles-Clark. Joetta, systir Hazel, náði síðan þriðja sætinu með miklum endaspretti og allar tryggðu þær sér sæti á Ólympíuleikunum.

Hlaupakonan Gail Devers sigraði í 100 m grindahlaupi og setti um leið nýtt amerískt met með því að hlaupa á tímanum 12,33 sekúndum.

John Godina sem komst ekki í Ólympíuhóp Bandaríkjanna í sinni aðalgrein, kúluvarpinu varð annar í kringlukasti og mun keppa gegn Magnúsi Aroni Hallgrímssyni í Sydney.