Skipun í húsnæðisnefnd Reykjavíkur: Misskilningur að BSRB eigi að tilnefna í nefndina ­ segir Davíð Oddsson borgarstjóri DAVÍÐ Oddsson borgarstjóri Reykjavíkur segir það ekki fá staðist að lög um húsnæðisnefndir í bæjar- og sveitarfélögum beri að túlka...

Skipun í húsnæðisnefnd Reykjavíkur: Misskilningur að BSRB eigi að tilnefna í nefndina ­ segir Davíð Oddsson borgarstjóri

DAVÍÐ Oddsson borgarstjóri Reykjavíkur segir það ekki fá staðist að lög um húsnæðisnefndir í bæjar- og sveitarfélögum beri að túlka svo, að heildarsamtök launþega eigi að tilnefna fulltrúa í húsnæðisnefnd. "Lögin bera með sér að átt er við stærstu félögin á hverjum stað," segir hann. Stjórn BSRB og stjórn Starfsmannafélags Reykjavíkur gera báðar tilkall til að tilnefna fulltrúa í nafni stærstu samtaka launafólks í Reykjavík, en borgarstjórn hefur farið fram á tilnefningu Starfsmannafélagsins.

Í lögunum segir að stærstu "sam tök" launafólks skuli tilnefna tvo fulltrúa í fimm manna nefndir, en þrjá í sjö manna húsnæðisnefndir.

"Borgarráð kaus fyrir alllöngu síðan í nefndina, fjóra fulltrúa. Síðan hafa Verslunarmannafélag Reykjavíkur og Starfsmannafélag borgarinnar þegar tilnefnt sína fulltrúa og ég geri ráð fyrir að Verkamannafélagið Dagsbrún skipi sinn fulltrúa á morgun eða hinn daginn," sagði borgarstjóri í samtali við Morgunblaðið í gær.

Davíð segir Starfsmannafélag Reykjavíkur hafa fengið bréf frá borgarstjórn um að tilnefna í nefndina. "Það er auðvitað algjör misskilningur hjá BSRB að það sé eitt af stærstu svæðisbundnu félögunum á þessu svæði hér. Það sér hver maður í hendi sinni að er bara misskilningur og rugl," sagði hann.

Davíð sagði að það fengi ekki staðist, sem vitnað er til af hálfu BSRB í umburðarbréfi félagsmálaráðherra, þar sem ráðherra túlkar lagaákvæðið svo, að um heildarsamtök launþega sé að ræða. "Ef BSRB er stærsta félagið í Reykjavík, þá er það, ásamt ASÍ, jafnframt stærsta félagið út um allt land. En lögin bera með sér að átt er við stærstu félögin á hverjum stað. Þessi tvö landssamtök geta ekki flokkast undir það, það er fáránleikinn sem þá blasir við. Þannig að þetta er bara misskilningur og því hefur þegar verið svarað við BSRB," sagði Davíð Oddsson borgarstjóri.

Ögmundur Jónasson, formaður BSRB, segir engan vafa leika á þvíað BSRB eigi að tilnefna fulltrúa í húsnæðisnefndirnar, og það hafi verið gert í öllum bæjar- og sveitarfélögum nema Reykjavík og fáeinum öðrum stöðum. "Ég trúi því ekki að menn vilji ekki hlýta landslögum, en komi það hins vegar fyrir, þá hljóta menn að setjast niður að nýju og skoða málin. Mér finnst sá tilgangur laganna að sjá til þess að meirihluti launafólks eigi fulltrúa í húsnæðisnefndum vera alveg augljós, auk þess sem skýrt er kveðið á um það í lögunum. Annað eru hreinlega hártoganir, og ef menn þurfa að láta lögfræðinga stafa alla hluti ofan í sig þá veit ég ekki hvert menn eru komnir. Það er hverjum manni skiljanlegt hvað stendur í þessum lögum þó hann hafi ekki tekið lögfræðipróf, og það hefur hvorki vafist fyrir mér né fulltrúum í stjórn BSRB, eða fulltrúum aðildarfélaganna sem komu saman til að velja fulltrúa BSRB."