„Barlady'' keppnin á Íslandi fyrir konur og kvár í veitingabransanum var haldin í fyrsta sinn síðastliðinn þriðjudag. Keppnin er forkeppni fyrir alþjóða ,,Barlady'' keppnina sem fer fram í Aþenu í byrjun mars, en sigurvegarinn hér heima fer út og keppir fyrir Íslands hönd.

Keppnin er haldin af Barþjónaklúbbi Íslands og Samtökum Íslenskra Eimingarhúsa (SÍE) þar sem áherslan er sett á íslenskar vörur. Keppendur fengu dregið eimingarhús og þurftu að nota vöru frá því í forgrunni kokteilsins.

Aðilar af SÍE eru:

• Eimverk Distillery
• Reykjavík Distillery
• Þoran Distillery
• Brunnur Distillery
• Hálogi Distillery
• Hovdenak Distillery

Keppnin var svokölluð ,,Walk Around'' keppni þar sem dómarar fóru á milli staða keppanda og smökkuðu drykkina þeirra. Í dómnefnd voru: Elna María Tómasdóttir (Barþjónaklúbbur Íslands) , Albe E H Hough (Brunnur Distillery), Judith Orlishausen (Reykjavík Distillery) og Brynja Hjaltlín (Hovdenak Distillery).

Alls tóku 15 þátt

15 keppendur tóku þátt í keppninni og er gaman að sjá hvað flóra íslenskrar bar menningar fer sífellt stækkandi.

Keppendur voru:

• Auður Gestsdóttir - Tipsý
• Dagný Ásgeirsdóttir - Ský Bar & Lounge
• Edda Becker - Fjallkonan
• Eva Einvarðsdóttir - Einstök Bar
• Eydís Rós Hálfdánardóttir - Risið Vínbar
• Freyja Þórisdóttir - Reykjavík Cocktails
• Helga Signý Sveinsdóttir - Tipsý
• Katrín Klara Þorgrímsdóttir - Apótek
• Kría Freysdóttir - Tipsý
• Lorax - Drykk
• Natalia Magdalena Krupa - Jörgenssen
• Sara Rós Lin Stefnisdóttir - Sushi Social
• Victoria Dydula - Fjallkonan
• Hera Marín Einarsdóttir - Höfnin
• Victoría Lazar - Sæta Svínið

Sigraði með kokteilnum Letty

Það var Helga Signý Sveinsdóttir á Tipsý sem kom sá og sigraði með kokteilnum sínum Letty og deilir hér með lesendum matarvefs mbl.is uppskriftinni að sínum verðlaunakokteil. Annað sætið hreppti Sara Rós á Sushi Social og í þriðja sæti var Auður Gestsdóttir frá Tipsý.

Í tilefni þessa sviptum við hulunni af verðlaunakokteilnum Letty sem bar sigur úr býtum að þessu sinni.

Letty

• Kramið handfylli af mangó
• 30 ml Flóki Single Malt Sherry Cask Finish
• 20 ml Aperol
• 15 ml Averna Amaro
• 20 ml Chili hunangs cordial
• 30 ml sítrónusafi
• 10 ml sykursíróp
• Brennt chili til skrauts

Aðferð:

1. Setjið allt hráefnið kokteilhristara og hristið vel saman.
2. Sigtið blönduna í Rocks glas.
3. Skreytið með brenndu chili.