Matur | mbl | 7.4.2024 | 11:30

Litríkir dúnmjúkir kanilsnúðar fyrir þig

Ómótstæðilega freistandi kanilsnúðar með sumarlegu ívafi. Ljósmynd/Berglind Hreiðars

Hér er uppskrift að dúnmjúkum kanilsnúðum með glassúr eins og í Ameríkunni. Það er fátt sem er betra og erfitt er að standast þessa ómótstæðilegu snúða. Hér þarf hins vegar þolinmæði þegar kemur að hefunartíma svo það er tilvalið að byrja þessa snúðagerð að morgni eða fyrri hluta dags ef þið viljið bjóða upp á þá með kaffinu og gera eitthvað skemmtilegt á milli þess sem deigið þarf að hefast. Uppskriftin kemur úr smiðju Berglindar Hreiðars köku- og matarbloggara hjá Gotterí og gersemar og birtist uppskriftin á uppskriftavef Gott í matinn.

Litríkir og dúnmjúkir kanilsnúðar

1 skammtur

Snúðadeig

1 bréf þurrger (11,8 g)
120 ml volgt vatn
50 g sykur (+ 1 msk. í vatnið)
180 ml nýmjólk
60 g brætt smjör
1 stk. egg
1 tsk. salt
2 tsk. vanilludropar
520 g hveiti

Aðferð:

Blandið þurrgeri og volgu vatni saman og setjið 1 msk. af sykri saman við og hrærið, leyfið að standa á meðan annað er undirbúið og blandan ætti að freyða vel eftir nokkrar mínútur.
Setjið mjólk, brætt smjör, egg, salt og vanilludropa í hrærivélarskál með króknum.
Hellið gerblöndunni saman við og bætið hveitinu þá við í nokkrum skömmtum.
Hnoðið í nokkrar mínútur, takið deigið þá úr skálinni og hnoðið það í kúlu á borðinu.
Penslið skál að innan með matarolíu og veltið kúlunni upp úr olíunni í skálinni, plastið síðan skálina og leyfið deiginu að hefast í 2 klukkustundir.
Setjið deigið þá á hveitistráðan flöt og ýtið með fingrunum/fletjið út í um 40 x 50 cm rétthyrndan flöt.
Útbúið fyllinguna og haldið áfram.

Fylling og penslun

80 g smjör við stofuhita (+ 50 g brætt til penslunar)
60 g sykur
110 g púðursykur
2 msk. kanill

Aðferð:

Smyrjið smjörinu sem er við stofuhita á deigið. Hægt er að gera það ýmist með fingrunum eða pensli og það er allt í lagi þó það sé aðeins ójafnt.
Hrærið báðum tegundum af sykri ásamt kanil í skál og stráið jafnt yfir smjörið.
Rúllið þétt upp og skiptið niður í 12 hluta.
Smyrjið skúffukökumót sem er um 30 x 40 cm á stærð vel að innan með smjöri og raðið snúðunum 3 x 4 með smá bil á milli.
Plastið og hefið að nýju í 1 klukkustund.
Hitið ofninn í 175°C, penslið snúðana með brædda smjörinu og bakið í 20-25 mínútur eða þar til þeir verða vel gylltir.
Leyfið að kólna aðeins og setjið þá glassúrinn á.

Glassúr

420 g flórsykur
100 g brætt smjör
90 ml nýmjólk
2 tsk. vanilludropar
1⁄4 tsk. salt
matarlitur

Aðferð:

Allt sett saman í skál og pískað saman þar til kekkjalaust.
Skiptið niður í 3 skálar og litið í mismunandi litum með matarlit.
Penslið snúðana með mismunandi litinn glassúr og njótið.
Það má einnig sleppa því að lita glassúrinn og smyrja honum hvítum yfir allt saman.
Berið fram og njótið í góðum félagsskap sem gleður og gefur.