Guðrún Kristín Huldudóttir er 22 ára nemi sem ákvað fyrir einu og hálfu ári að taka sig í gegn. Hún er nú búin að missa 51 kíló.
Þegar Guðrún Kristín var að verða sextán ára fór bæði líkamleg og andleg heilsa niður á við eftir að hún lenti í bílslysi. Jeppi á 80 kílómetra hraða keyrði á hana þar sem hún var á skellinöðru með þeim afleiðingum að hún lenti úti í hrauni. „Ég er bara heppin að vera ekki lömuð og yfir höfuð að vera á lífi, það er eiginlega ótrúlegt hvað ég slasaðist lítið. En þetta tók mikið á andlegu hliðina, ég mátti ekki gera neitt í langan tíma. Þetta er búið að vera mjög erfitt í mörg ár,“ segir Guðrún Kristín.
Guðrún Kristín var í sjúkraþjálfun vegna slyssins í fimm ár en um það leyti sem Guðrún Kristín var að klára sjúkraþjálfunina í fyrra lést amma hennar skyndilega langt fyrir aldur fram. „Þá hugsaði ég bara, heyrðu mig langar að (ná að) verða gömul og ég verð ekki gömul með þessu áframhaldi. Ég var orðin mjög þung og heilsan versnaði bara með hverju árinu,“ segir Guðrún Kristín og ákvað að gera eitthvað í sínum málum.
„Ég hef oft farið af stað en það hefur ekki skilað neinum árangri því ég var að gera það á mjög öfgafullan hátt. Ég kannski byrjaði á því að missa fullt af kílóum en enda síðan á verri stað en ég byrjaði,“ segir Guðrún Kristín og byrjaði mjög rólega í þetta skiptið. Í rauninni svo rólega að það fyrsta sem hún gerði var bara að byrja að drekka meira vatn.
Guðrún Kristín segist hvergi hafa leitað ráða en notar bara heilbrigða skynsemi auk þess sem hún fékk mikinn stuðning frá móður sinni. Móðir hennar ráðlagði henni líka að fara rólega og breyta bara einhverjum einum vana í einu. „Ég var alltaf í strætó á þessum tíma og ég byrjaði að fara út einni stoppistöð áður en ég þurfti til þess að ganga aðeins lengra heim. Svo tveimur svo þremur, tók bara pínulítil skref.“
Rúmum mánuði eftir að Guðrún Kristín byrjaði á þessu hringdi móðir hennar í hana og bauð henni með í göngutúr. Hún samþykkti það sem kom móður hennar töluvert á óvart þar sem hún hafði oft boðið Guðrúnu Kristínu að koma með sér í göngutúr en hafði aldrei fengið jákvætt svar frá henni. Guðrún Kristín hafði einmitt einnig sett sér það markmið að segja oftar já hvort sem það væri að fara í göngutúr eða bara hitta vini sína. Þessir göngutúrar urðu að ákveðinni reglu.
Í júní í fyrra bauð móðir hennar Guðrúnu Kristínu með sér á Úlfarsfell og í jákvæðni sinni stökk hún til. „Ég ætla ekkert að ljúga þetta var bara mjög erfitt fyrir mig þá, ég var bara heillengi á leiðinni upp og frekar lengi á leiðinni niður líka.“ Guðrún Kristín komst upp og niður og fann því að þetta var ekki eitthvað sem var óyfirstíganlegt. Hún fékk síðan bullandi áhuga á fjallgöngum eftir að hún fór á Mosfell stuttu síðar. Hennar eina líkamsrækt hefur því verið göngur en hún hefur ekki stigið fæti inni í líkamsræktarstöð á þessu einu og hálfa ári sem hún hefur misst þessi 51 kíló.
Guðrún Kristín tók skyndiákvörðun einum og hálfum mánuði fyrir Reykjavíkurmaraþonið í ár og ákvað að hlaupa tíu kílómetra en hún hafði ekkert hlaupið síðan í grunnskóla. „Þetta var svolítil áskorun fyrir mig. Svo var ég bara að vinna á fullu og ég komst ekki út að hlaupa nema fjórum sinnum. En ég kláraði samt tíu kílómetrana,“ segir Guðrún Kristín en hún lenti nokkrum sinnum í því að fólk hafði ekki trú á henni að hún kæmist alla leið. „Þetta kenndi mér að láta engan segja þér hvað þú getur gert, gerðu það bara,“ segir Guðrún Kristín.
Guðrún Kristín segist í rauninni ekki hafa borðað neitt sérstaklega óhollan mat áður en borðaði bara mjög óreglulega. „Þetta gerir það að verkum að maður leitar meira í einhvers konar snakk.“ Því var mikilvægt fyrir hana að koma reglu á matinn. Hún segir að það sé algjört lykilatriði að hafa nesti með sér í skóla og vinnu. „Ég held að það skipti mjög miklu máli af því að ef þú tekur ekki með þér nesti grípurðu bara með þér það sem er næst hvort sem það er bakaríið eða eitthvað annað.“
Guðrún segist alveg leyfa sér pizzu og annað sem henni finnst gott. „Ef ég færi að taka allt út þá mundi ég aldrei halda það út. Mér fannst miklu gáfulegra að bæta inn en ekki banna. Og ef þú kemur heim úr göngu þá sestu ekki niður og færð þér pizzu, það passar ekki. Þú tekur ekki með þér kók í fjallgöngu. Þetta kemur svolítið af sjálfu sér.“
Guðrún finnur mjög mikinn mun á sér nú og fyrir einu og hálfu ári. Hún er miklu orkumeiri og hressari. „Ég var oftar slöpp, ég held ég hafi verið einu sinni veik á síðasta ári en áður var ég mjög oft með kvef. Ég finn líka mun á því hversu mikið mig langar að vera gera eitthvað. Ég hef meiri orku að vera með vinum og ættingjum og sinna áhugamálum en ég hafði áður. Ég held það sé líka eftirsóknarverðara fyrir annað fólk að vera með mér en áður. Ég er miklu jákvæðari en ég var. Mér finnst lífið bara upp á við núna.“
Tölurnar á vigtinni og útlitið skipta Guðrúnu Kristínu ekki öllu máli, það er í rauninni bara bónus. „Mig langaði ekkert endilega að vera grönn, mér fannst ég alveg mjög fín þegar ég var feit. En mig langaði að verða heilbrigð og mig langaði að ná að verða gömul,“ en henni finnst miklu merkilegra en að vera búin að léttast að vera núna meira en helmingi fljótari upp og niður Úlfarsfell en þegar hún fór í fyrsta skiptið.
Hún þakkar ömmu sinni fyrir árangurinn en þær áttu mjög náið samband. Guðrún er fullviss um að amma hennar væri mjög stolt af henni núna og það hefur hjálpað henni þegar hún er við það að gefast upp. Hún segir það líka mikla hjálp að taka árangursmyndir enda segir vigtin ekki alla söguna. „Ég tók til dæmis mynd af mér í janúar og síðan aftur í byrjun júní og þá var ég jafnþung. En munurinn á myndunum var svakalegur og það er eiginlega ótrúlegt að pæla í því að það munar ekki einu einast grammi á myndunum.“
„Ráðin mín eru að banna þér ekkert og byrja frekar á því að bæta einhverju við. Byrjaðu á því að drekka vatn. Ég minnkaði um skóstærð bara við það að drekka vatn,“ segir Guðrún Kristín að lokum.