Fyrrum liðsmaður Astralis, Kristian „k0nfig“ Wienecke mun spila fyrir Heroic á komandi stórmóti í Counter-Strike. Þetta er stórt skref í endurkomu hans á hæsta keppnisstig í leiknum.
Kristian ferðaðist með fyrrum liði sínu, Astralis, til Möltu síðastliðinn september þar sem liðið var mætt til að keppa í ESL Pro League 16. Eitt kvöldið fór liðið saman til þess að fagna og skemmta sér og lenti Kristian þá í dyraverði sem var heldur ógnandi.
Hann hefur tjáð fjölmiðlum að dyravörðurinn hafi hent honum af skemmtistaðnum, hrækt í andlit hans og sparkað í hann er hann lá á jörðinni.
Kristian fór síðar að dyraverðinum og lenti í útistöðum við hann á ný, en í þetta sinn voru brotin heldur alvarlegri þar sem Kristian fótbrotnaði og fékk spark í höfuðið.
Kristian viðurkenndi á Twitter að það hefðu verið mistök að veitast að dyraverðinum í seinna skiptið og segir engum öðrum að kenna en sjálfum sér að hann sé í þessari stöðu sem hann er í.
Eftir atvikið var samningi hans við Astralis rift og hefur Kristian verið án liðs síðan. Kristian hefur verið talinn einn af bestu Counter-Strike leikmönnum í dag.
Astralis hafa enn í dag ekki gefið upp ástæður brottrekstursins en Kristian segir það hafa komið honum virkilega á óvart, draumur hans var að vera hluti af liði sem styður við bak hans en ákvörðunin gerir það að verkum að erfitt er að finna sér nýtt lið.
Kristian hefur unnið í sjálfum sér, hann segist vera klár að byrja að spila aftur á hæsta keppnisstigi og þátttakan á stórmótinu í Dubai gæti verið fullkominn vettvangur til þess að snúa aftur.
Hann segir mörg lið hafa haft samband í von um að krækja sér í undirskrift sína en hann ætlar ekki að taka ákvörðun strax hvar hann mun spila.