Armstrong vill að málið verði fellt niður

Hjólreiðagarpurinn fyrrvarandi Lance Armstrong, sem missti sjö Tour de France-titla þegar upp komst að hann notaði ólögleg lyf, vill að bandaríska ríkið dragi til baka kæru á hendur honum sem kemur til vegna þess hann er ásakaður um að hafa blekkt almenning með lyfjahneykslinu.

Armstrong gefur lítið fyrir þessa kæru og bendir á að nú séu menn að bjarga eigin skinni því ekki var hann rannsakaður eða neitt gert í málunum á árum áður þegar hann var ítrekaður bendlaður við lyfjasvindl, þrátt fyrir að vera styrktur af bandarísku póstþjónustunni.

„Nú þykist ríkið vera í rusli vegna þessa ásakanna en það sem það gerði á sínum tíma talar sínu máli,“ segir Armstrong í beiðni sinni um að málið verði látið niður falla.

„Var ríkið að setja liðið í bann á meðan það var rannsakað? Var málið lagt á borð ótal lögfræðinga ríkisins og rannsóknarmanna þeirra? Nei, það var ekki gert. Í staðinn fyrir að nýta rétt sinn og rifta samningi við liðið var samningurinn framlengdur.“

„Rökin á bakvið ákvörðun ríkisins voru einföld. Armstrong hafði nýlega unnið Frakklandshjólreiðarnar árið 2000 og ríkið vildi eiga sigurvegara og njóta alls þess sem fylgir að styðja við bakið á þannig manni. Það fékk líka nákvæmlega það sem það þurfti á þeim tíma,“ segir Lance Armstrong.

• Blogga um frétt