Njarðvíkingar voru ekki lengi að finna eftirmann Julijan Rajic sem gekk til liðs við Hamar. Sá er franskur og 206 cm hár miðherji samkvæmt fréttatilkynningu frá Njarðvík.
Miðherjinn heitir Eric Katenda og samdi við Njarðvík fram á sumar. Katenda er fæddur 1992 og lék með Notre Dame og North Texas á háskólaferli sínum í Bandaríkjunum. Katenda lék í Pro A deildinni í Frakklandi og nú síðast í Svíþjóð með Uppsala samkvæmt því sem fram kemur í tilkynningunni.
Katenda er ekki kominn með leikheimild en ekki er ljóst hvort hans fyrsti leikur með Njarðvík verði gegn KR eða Grindavík.
Njarðvík situr í efsta sæti Dominos-deildar karla og leikur nú gegn Haukum en á aftur leik strax á mánudagskvöldið gegn KR.