Einn af táknrænustu bílum Fiat hverfur senn af vegum því framleiðslu hans hefur verið hætt.
Hér er um aðp ræða Fiat Punto sem verið hefur í sölu í 13 ár. Ólíklegt er talið að boðið verði upp á arftaka í sama stærðarflokki, þar sem rými í bílsmiðjunni í Melfi á Ítalíu verður í staðinn notað til að framleiða nýjan Maserati lúxusjeppa.
Nú á lokasprettinum í framleiðslu hlotnaðist Fiat Punto hinn vafasami heiður að fá enga stjörnu í árekstrarprófum öryggisstofnunarinnar Euro NCAP.
Síðasta kynslóðin af Punto var sú þriðja, en bíllinn kom fyrst á götuna 2005 sem Grande Punto. Fékk hann andlitslyftingu og uppfærslur árið 2009 og var upp frá því nefndur Punto Evo. Tók svo upphaflega Punto-nafnið við með annarri uppfærslu bílsins 2012.
Við brotthvarf Punto mun Fiat leggja aukna áherslu á sölu 500-bílanna og bæta við hana rafbíl 500e. Þá bætist 500 Giardinera langbakur við er ný kynslóð verður kynnt á næsta ári, 2019.
Hermt er að Panda muni senn fá nýjan arftaka. Tipo og 124 Spider munu áfram verða í boði.