Á von á sjötta barninu á níu árum

Fyrrverandi Dawson's Creek-stjarnan James van Der Beek á von á sínu sjötta barni með eiginkonu sinni Kimberly van Der Beek. Það verður nóg að gera hjá van Der Beek-hjónunum á næstunni en elsta barnið er fætt árið 2010 en það yngsta árið 2018. 

Leikarinn greindi frá gleðifréttunum á Instagram en tökulið frá þættinum Dancing With the Stars fór með hjónunum í fyrstu skoðunina og mynduðu þegar hjónin sáu hjartsláttinn.

Hollywood-stjarnan segir að þrátt fyrir barnalánið hafi þau hjónin ekki alltaf gengið út úr fyrstu skoðun með gleðitár og því voru þau tilbúin að láta mynda ferðalagið hver sem útkoman yrði. 

„Ég hef farið í þrjá svona tíma til þess eins að komast að því að það er enginn hjartsláttur eða ekkert barn,“ skrifar leikarinn um leið og hann deildi gleðifréttunum.

Hann er ekki sáttur við orðið sem notað er fyrir fósturlát á ensku eða miscarriage. Segir hann að fósturlát sé eitthvað sem fólk talar sjaldan um. Hann vill þó skömmina burt og segir eðlilegt að syrgja. Hann segir þau hjónin hafa ákveðið að sýna þessa viðkvæmu stund í sjónvarpi til þess að leggja sitt af mörkum. Van Der Beek-hjónin vilja að fólk hætti að finna fyrir tilgangslausri skömm og hvetja fólk um leið til að opna sig um reynsluna við vini og vandamenn. 

• Blogga um frétt