Líklega síðasta barn Kristbjargar og Arons

Einkaþjálfarinn Kristbjörg Jónasdóttir á von á sínu þriðja barni með eiginmanni sínum, Aroni Einari Gunnarssyni, landsliðsfyrirliða í knattspyrnu. Hún birti þrívíddarmynd af ófæddu barni þeirra Arons Einars á Instgram í gær og skrifaði í einlægum pistli að þetta barn væri líklega þeirra síðasta. 

Kristbjörg segir að meðgangan hafi ekki verið eins og hún lagði upp með. Kristbjörg er komin 30 vikur á leið og segir að hún sé rétt svo að átta sig núna á því að hún sé ólétt. Hún skrifar að það hljómi örugglega undarlega og það sé erfitt að útskýra það en ef hún eigi að vera alveg hreinskilin þá segist hún ekki hafa leyft sér að vera í núinu. Spilar þar kórónuveirufaraldurinn inn í og allt sem hefur fylgt honum. 

„Ég lofaði sjálfri mér að ef ég yrði svo heppin að verða ólétt aftur að þá myndi ég hugsa vel um mig og njóta hverrar mínútu. Hefur það gerst? Langt því frá! Hefur það verið auðvelt? Alls ekki, þetta hefur verið erfiðasta meðganga sem ég hef upplifað bæði líkamlega og andlega,“ skrifar Kristbjörg og segist jafnframt ekki vita af hverju hún er að deila þessu með fylgjendum sínum. Hún skrifar að hún sé að reyna að minna sig á að vera þakklát fyrir upplifunina þrátt fyrir að hún hafi verið erfið. 

Kristbjörg greinir einnig frá að þetta barn verði líklega það síðasta sem þau Aron Einar eignast til þess að fullkomna fjölskylduna. Hún skrifar að hún sjái eftir því að hafa ekki notið þess meira en skrifar þó að hún eigi enn tíu vikur eftir. 

Kristbjörg hvetur konur sem eru óléttar að njóta þess að finna barnið stækka í maganum. „Þessi tími er svo dýrmætur jafnvel þó að hann sé ekki eins og við vonuðumst til.“

• Blogga um frétt