Leikkonan Mena Suvari tók á móti sínu fyrsta barni í apríl 2021, en hún segist enn glíma við fæðingarþunglyndi á hverjum degi þrátt fyrir að meira en ár sé liðið frá því sonur hennar kom í heiminn.
Suvari opnaði sig um reynslu sína af fæðingarþunglyndi í hlaðvarpsþættinum Broad Ideas. „Ég glími við fæðingarþunglyndi á hverjum degi. Ég er að fara í hormónapróf í næsta mánuði, svo já, þetta er allt mjög raunverulegt. Ég glími við þetta á hverjum degi,“ sagði hún.
Hún segir stærstu áskorunina frá fæðingu sonar síns hafa verið að átta sig á því að það sé í lagi að fara út úr húsi og eyða tíma ein með sjálfri sér. „Ég man að ég sat á svölunum okkar og sagði: „Ég verð að fara út úr húsinu. Ég verð að komast út úr húsinu.“ Maðurinn minn sagði mér að ég gæti farið, til dæmis í göngutúr, en ég hélt að ég gæti það ekki,“ bætti Suvari við.
Leikkonan ræddi líka um hversu erfið fæðingin hafi verið, en eftir að hafa verið með hríðar í yfir 48 klukkustundir fóru draumar hennar um náttúrulega fæðingu út um gluggann, en hún var send í bráðakeisara.
„Við sem mæður eigum rétt á þessum tilfinningum, og bara vegna þess að ég á fallegt barn sem er fullkomlega heilbrigt, dásamlegan mann, við höfum komist út af spítalanum, finnst mér samt eins og ég megi vera sorgmædd yfir fæðingunni sem ég upplifði,“ sagði Suvari.