Breska lággjalda flugfélagið Wowcher leitar nú að heppnum ferðalangi til þess að ferðast um heiminn í heilt ár í boði þeirra.
Auk þess að fá að fljúga frítt um heiminn bjóða þau 25 þúsund pund í árslaun. Ferðalangurinn heppni mun ferðast til 40 áfangastaða á 12 mánuðum og þarf að deila ævintýrum sínum á samfélagsmiðlunum Instagram og YouTube. Kröfurnar eru því nokkuð góð kunnátta á myndatöku og myndvinnslu.
Allir geta sótt um starfið, en umsóknin fer fram á samfélagsmiðlum. Eina sem þarf að gera er að setja inn 30 sekúndna langt myndband um af hverju þú ættir að fá starfið. Umsóknarfrestur er til 30. desember 2019.
Sá sem hreppir starfið þarf ekki að ferðast einn heldur má hann taka ferðafélaga með sér. Það þarf ekki að vera sama manneskjan sem kemur með á alla áfangastaðina heldur má skipta reglulega um ferðafélaga.
Áfangastaðir eru meðal annars París, Brussel, Róm, Grikkland, New York, Las Vegas og Balí.