Mörg eigum við eitthvað ákveðið sem við getum ekki verið án á ferðalögum. Sumir kjósa að taka alltaf með sér sitt eigið koddaver og aðrir taka með sér harðfisk til þess að grípa í á ferðalögum. Breska konungsfjölskyldan er þar engin undantekning.
Elísabet II Bretlandsdrottning pakkar alltaf Earl Grey-tei. Hún er mikil tedrykkjukona og fær sér alltaf mjólk í teið en engan sykur.
Karl Bretaprins og Kamilla hertogaynja taka alltaf með sitt eigið áfengi þar sem þau vilja draga úr hættu á því að einhver eigi við drykkina þeirra. Þau burðast þó ekki með áfengið sjálf á samkomur heldur sjá lífverðirnir um það verk. Uppáhaldsdrykkur Karls er gin og tónik. Þetta segir Gordon Rayner blaðamaður sem ferðast hefur með konungfjölskyldunni víða.