Þetta eru bestu flugfélög heims árið 2021

Qatar Airways er besta flugfélag heims árið 2021 að mati AirlineRatings.com. Flugfélagið stökk upp listann og hirti fyrsta sætið af Air New Zealand sem hefur vermt toppsætið undanfarin sex ár. 

Geoffrey Thomas, ritstjóri hjá Airline Ratings, sagði í samtali við CNN Travel að viðbrögð Qatar Airways hefðu verið úrslitaþátturinn í mati vefsins á flugfélögum. 

„Qatar Airways hefur alltaf náð hátt á lista okkar, unnið fjölda verðlauna eins og til dæmis fyrir besta viðskiptafarrýmið. Það sem fleytti þeim núna upp í fyrsta sætið var að þau flugu að mestu í gegnum heimsfaraldurinn, og dómararnir voru hrifnir af því,“ sagði Thomas. 

Airline Ratings gefur listann sinn vanalega út í nóvember áður en nýtt ár gengur í garð. Á síðasta ári slepptu þau að gefa út listann og ákváðu að bíða og fylgjast með starfsemi flugfélaga í heimsfaraldrinum. 

Hagnaður flugfélaga og hagnaður af hverri ferð er vanalega með inni í reikniformúlunni en vegna heimsfaraldursins var ákveðið að taka þær breytur ekki með þetta árið. „Við þurftum að sleppa því í ár af því flestöll flugfélög eru í taprekstri,“ sagði Thomas.

1. Qatar Airways
2. Air New Zealand
3. Singapore Airlines
4. Qantas
5. Emirates
6. Cathay Pacific
7. Virgin Atlantic
8. United Airlines
9. EVA Air
10. British Airways
11. Lufthansa
12. ANA
13. Finnair
14. Japan Air Lines
15. KLM
16. Hawaiian Airlines
17. Alaska Airlines
18. Virgin Australia
19. Delta Air Lines
20. Etihad Airways

• Blogga um frétt