Nokkrir af vinsælustu áhrifavöldum landsins skelltu sér til London í morgun. Þær Birgitta Líf Björnsdóttir, Sunneva Eir Einarsdóttir, Ástrós Traustadóttir, Magnea Björg Jónsdóttir og Ína María Norðfjörð ætla að mála London rauða um helgina.
Stelpurnar eru þekktar fyrir að vera vinkonur og innsigluðu vináttuna með húðflúrinu LXS í fyrra. Kristín Pétursdóttir er einnig í hópnum en er vant við látin og komst ekki með í ferðina. Hildur Sif Hauksdóttir er sjöunda vinkonan en hún býr í London.
Það er stíf dagskrá í ferðinni og hafa stúlkurnar birt myndir af formlegri dagskrá í sögu á Instgram. Ferðin hófst upp úr þrjú í nótt þegar þær hittust til þess að fara samferða út á völl. Þær lentu í hádeginu í London í rigningu en bílstjórinn sem keyrði þær upp á hótel tók á móti þeim með freyðivíni.