Það er eitt og annað sem er viðeigandi að gera þegar maður fer í flug. Stuttbuxur eða ekki stuttbuxur, linsur eða gleraugu, sokkar eða skór, það er ýmislegt sem maður þarf að velta fyrir sér. Ferðavefurinn tók saman nokkra hluti sem betra er að sleppa í háloftunum.
Þetta er það sem maður á að forðast í flugi:
- Ef þú ert þyrstur í flugi skaltu forðast drykki sem hafa klaka eða kranavatn í eins og til dæmis te eða kaffi. Vatnstankarnir í flugvélum eru gamlir og fullir af sýklum.
- Ekki vera í stuttbuxum eða halla þér upp að glugganum. Þú gætir verið að fá á þig fullt af sýklum.
- Aldrei ganga um vélina berfættur, stundum leynast þar glerbrot eða þá önnur ógeðfelld óhreinindi.
- Ekki sitja kyrr allt flugið. Það er mikilvægt að halda sér á hreyfingu við og við til þess að minnka líkur á blóðtappa og óþægilegri vökvasöfnun í útlimum. Teygðu úr þér að minnsta kosti einu sinni á klukkutíma fresti.
- Ekki vera með linsur í flugi. Reyndu ef þú getur að hafa gleraugu í staðinn. Loftið í flugvélum er mjög þurrt og getur verið ertandi fyrir augu. Þá er líka oftast ekki mælt með að sofna með linsur í sér, þannig að ef maður vill fá sér blund í vélinni er betra að vera ekki með linsur.
- Ekki slökkva á blæstrinum fyrir ofan sætið. Það getur hjálpað til við að feykja sýklunum frá þér. Farðu frekar í peysu ef þér er kalt.
- Ekki borða matinn sem hefur komist í snertingu við sætaborðið. Það er sjaldnast þrifið á milli ferða og sumir hafa gengið svo langt að skipta um bleiu á slíkum borðum. Þannig að kannski er góð hugmynd að vera með sótthreinsiklúta með sér til að þrífa borðið.
- Ekki nota teppin sem eru um borð í flugvélum. Þau eru ekki þvegin nógu oft.
- Ekki snerta neitt inni á klósetti. Það sem maður á að gera er eftirfarandi: pissa, þvo hendur vandlega með sápu, þurrka sér og svo nota tissjú til þess að sturta niður úr klósettinu og opna dyrnar.
- Ekki gleyma húðumhirðu áður en þú ferð í flug. Það er t.d. mikilvægt að setja á sig gott krem því loftið er svo þurrt.
- Ekki sofna áður en vélin fer á loft. Þá er erfiðara fyrir eyrun að aðlagast þrýstingnum.
- Ekki fá þér gosdrykki. Maginn er viðkvæmari fyrir gosi þegar maður er kominn á flug og þetta gæti leitt af sér meltingartruflanir.