Ferðalög | Ferðalög erlendis | mbl | 28.1.2024 | 8:00 | Uppfært 31.1.2024 16:43

Elva fór í draumaferð til Taílands

Fjölskyldan fór í ævintýraferð til Taílands. Samsett mynd

Elva Kristín Arnarsdóttir fór í draumaferð til Taílands ásamt manni og börnum sínum tveimur. Hún segir ekki mikið mál að fara alla leið til Taílands þrátt fyrir að börnin séu aðeins tólf og sex ára gömul.

Elva elskar að ferðast samhliða því að reka heildverslun. Það var þó mágkona hennar sem skipulagði Taílandsferðina og segir hún fjölskylduna virkilega þakkláta. „Við vorum í 15 manna hóp sem gerði ferðina enn skemmtilegri. Við gistum á fimm mismunandi hótelum á Nai Yang Beach, Krabi og Kata Beach ásamt því að fara í tvo heila daga á bát þar sem við skoðuðum aðrar eyjar í kring þar á meðal eyjuna Phi Phi, Maya Bay, eyjuna Poda, apaströndina og svo lengi mætti telja, hver einasti staður var eins og draumur. Við fjölskyldan enduðum svo ferðina með dagstoppi í Abú Dabí á leið heim og fórum þar í safarí um eyðimörkina og á bak á kameldýrum,“ segir Elva um ferðina.

Elva segir að Taíland hafi lengi verið á stefnuskránni. „Við höfum farið víða en mælum einnig mikið með að prufa arabaland. Við vorum ein jólin í Barein og eins og ég sagði áðan þá vorum við einn dag í Abú Dabí og okkur þyrstir í að skoða þessi lönd nánar.“

Það toppar fátt að baða sig með fílum í Taílandi. Ljósmynd/Aðsend

Var stór ákvörðun að fara með börn í svona langt ferðalag?

„Alls ekki. Börnin hafa gott af því að sjá heiminn, sjá hvernig aðrir lifa og upplifa mismunandi menningarhópa. Börnin okkar voru algjörlega ástfangin af Taílandi eins og við.“

Þó svo að ferðalagið sé langt segir Elva frekar einfalt að fara til Taílands. „Þú þyrftir í raun bara sundföt og vegabréf og þú getur drifið þig af stað. Það eru þvottahús á hverju horni þar sem þú færð þvottinn þveginn og straujaðan eftir nokkra klukkutíma svo það sem ég ráðlegg fólki helst er að taka sem minnst með sér,“ segir hún.

Apar urðu á vegi Íslendinganna.

Fóru út í sjó með fílum

Hvað stóð upp úr á ferðalaginu?

„Það er erfitt að velja úr þar sem ferðin í heild sinni var draumur. En að fara út í sjó með fílum var þvílík upplifun fyrir alla. Allar þessar náttúruperlur, öll þessi afslöppun og allt þetta dásamlega fólk var klárlega eitthvað sem fékk okkur til að elska Taíland.“

Fílaknús í Taílandi. Ljósmynd/Aðsend

Það var líka mikilvægt að slaka á. Ljósmynd/Aðsend

Er eitthvað sem þið mælið með fyrir fólk sem er að plana ferð á sömu slóðir?

„Planið ferðalagið vel áður en þið leggið í hann. Verið búin að bóka daga fyrir ákveðna afþreyingu sem þið ætlið í, bóka bíla, veitingastaði og þess háttar og takið sem minnst með ykkur. Það er endalaust hægt að gera og því nauðsynlegt að vera skipulagður. Fríið verður líka mun skemmtilegra og afslappaðra ef hlutirnir eru planaðir fyrir fram.“

Fjölskyldan var búin að skipuleggja sig vel. Ljósmynd/Aðsend

Það var gaman hjá fjölskyldunni í eyðimörkinni. Ljósmynd/Aðsend

Verum þakklát fyrir það sem við höfum

Fundu þið fyrir því að þið voruð komin í aðra menningu?

„Það var klárlega ákveðið menningarsjokk að koma inn á Nai Yang Beach fyrsta daginn, þar sem allt er gjörólíkt því sem maður er vanur. En maður er fljótur að aðlagast og það sem maður tók með sér heim úr svona ferð var einna helst: Verum þakklát fyrir það sem við eigum og það sem við höfum, förum brosandi út í hvern dag og lifum lífinu.“

Ljósmynd/Aðsend

Ferðalög minna fólk á að vera þakklátt. Ljósmynd/Aðsend

Hvernig var maturinn?

„Maturinn var dásamlegur. Við borðuðum fjölbreyttan mat og prufuðum marga góða staði en taílenskur matur er þó eitthvað sem stóð algjörlega upp úr. En maður hefur heyrt að það borgi sig að velja staðina vel, sleppa klökum og ekki drekka vatn úr krönunum.“

Taíland var eins og draumur. Ljósmynd/Aðsend

Eru þið byrjuð að plana næstu ferð?

„Við erum alltaf að plana og erum með ýmislegt sem okkur langar að gera á árinu, það er fátt betra en að eiga gulrót eftir vinnutarnir. Við erum það heppin að geta bæði tekið vinnuna með okkur út í heim. Taíland er allavega mjög ofarlega á lista hjá okkur og ég vona að það verði ekki of langt í næstu ferð þangað,“ segir Elva að lokum.