Skilnaður Johnny Depp og leikkonunnar Amber Heard hefur mikið verið á milli tannanna á fólki undanfarið.
Leikkonan sótti um skilnað á dögunum og fór í kjölfarið fram á nálgunarbann á hendur Depp sem hún segir hafa beitt sig líkamlegu og andlegu ofbeldi á meðan sambandi þeirra stóð. Dómstólar staðfestu síðar að leikarinn þyrfti að halda sig fjarri Heard.
Leikkonan fer fram á að Depp greiði henni mánaðarlega 50.000 Bandaríkjadali í framfærslu, sem samsvarar rúmum sex milljónum íslenskra króna. Depp hefur neitað að verða við óskum Heard, en að sögn gerðu þau ekki með sér kaupmála áður en þau gengu í hjónaband.
Frétt mbl.is: Depp kominn með stjörnulögfræðing
Samkvæmt umfjöllun Mirror er auður Depps er metinn á um það bil 400 milljónir Bandaríkjadala, sem samsvarar rúmum 50 milljörðum íslenskra króna. Samkvæmt Forbes þénaði leikarinn 30 milljónir dollara á síðasta ári, eða rúmlega 3,7 milljarða íslenskra króna. Þá er hann einnig talinn hafa samið um að fá greiddar 95 milljónir Bandaríkjadala fyrir leik í Pirates of the Caribbeans: Dead Men Tell no Tales, sem frumsýnd verður á næsta ári.