Breska leikkonan Amanda Redman hefur verið fengin til þess að lesa inn á hljóðbók Huldu-seríu Ragnars Jónassonar sem kemur út í Bretlandi hjá Penguin útgáfunni. Fyrsta bókin er Dimma en hún hlaut nú um helgina frábæra dóma í Sunday Times og Guardian.
Amanda Redman er Íslendingum að góðu kunn en hún lék burðarhlutverk í sjónvarpsþáttunum At Home with the Braithwaites. Þættirnir voru sýndir á RÚV á árunum 2000 til 2003 og fjalla um fjölskyldu sem vann stóra vinninginn í lottó. Þættirnir nutu mikilla vinsælda og hlaut Amanda BAFTA sjónvarpsverðlaunin fyrir frammistöðu sína í þáttunum.
Gagnrýnandi Sunday Times sagði nú um helgina að Dimma eftir væri „stórkostleg“ og að Hulda, aðalpersóna bókarinnar, væri ein af mögnuðustu tragísku kvensöguhetjum samtímaglæpasagna. Þá sagði Guardian á laugardaginn í úttekt sinni á bestu nýju glæpasögunum að bókin væri „snilldarlega fléttuð“ og endalokin „rosaleg“.