Systurnar Khloé Kardashian og Kendall Jenner sáust ásamt kærustum sínum, körfuknattleiksmönnunum Tristan Thompson og Ben Simmons, í Mexíkó á dögunum. Jenner og Simmons hafa verið að hittast síðan í byrjun sumars en hafa haldið sambandi sínu utan sviðsljóssins. Hann hefur þó verið viðstaddur nokkra fjölskylduviðburði.
Kardashian og Thompson hafa ekki siglt lygnan sjó síðan þau eignuðust sitt fyrsta barn saman í apríl. Myndir af körfuknattleiksmanninum kyssa aðrar konur náðust skömmu fyrir fæðingu dóttur þeirra. Þau hafa þó verið að vinna í sínum málum og flutti hann með henni til Los Angeles í sumar.
Þeir Thompson og Simmons leika báðir í NBA-deildinni í Bandaríkjunum. Thompson leikur með Cleveland Cavaliers en Simmons leikur með Philadelphia 76ers. Leiktíðin í NBA hefst ekki fyrr en í október svo þeir hafa nægan tíma til að njóta lífsins í Mexíkó.