Íslenska kvikmyndin Lof mér að falla var frumsýnd í síðustu viku og gekk myndin afar vel í kvikmyndahúsum um helgina, hafa nú rúmlega 8.300 gestir séð myndina. Er frumsýning hennar fjórða stærsta opnun frá upphafi á íslenskri kvikmynd og um að ræða stærstu frumsýningarhelgi á íslenskri mynd síðan 2016.
Aðeins hafa Mýrin, Bjarnfreðarson og Eiðurinn þénað meira á frumsýningarhelgi. Með þessu áframhaldi stefnir myndin, sem hefur fengið jákvæðar viðtökur hjá gagnrýnendum sem og almennum áhorfendum, í að verða ein tekjuhæsta mynd ársins.
Baldvin Z leikstýrir myndinni en hann leikstýrði einnig Vonarstræti sem sló eftirminnilega í gegn en 58.000 gestir sáu þá mynd árið 2014. Lof mér að falla byrjar hins vegar mun betur en Vonarstræti og stefnir því í að myndin geri gott betur en Vonarstræti í kvikmyndahúsum.