Hálfviti á hátindi frægðarinnar

Leikkonan Gwyneth Paltrow segir í viðtali við The Sunday Times að frægðin hafi gert hana að hálfvita. 

Hin 46 ára gamla leikkona segir að allir hafi komið fram við hana eins og fræga manneskju og því hafi hún komist upp með það að vera hálfviti. Paltrow vann Óskarsverðlaun fyrir hlutverk sitt í kvikmyndinni Shakespeare in Love. 

„Sko, ég er fræg, það er komið fram við mig eins og fræga manneskju. Maður vill ekki vera hálfviti, en hægt og rólega þegar allt er fært úr vegi fyrir þig, og þú býrð í heimi þar sem enginn þarf að haga sér almennilega, þar sem fólk lætur þig ekki taka ábyrgð á eigin gjörðum og þar sem þau segja þér ekki sannleikann, þá verður þú að hálfvita.“

Hún segir að það hafi komið fyrir hana eftir Shakespeare in Love en að pabbi hennar, Bruce Paltrow, hafi komið henni aftur niður á jörðina. Paltrow segist hafa viljað átta sig á því fyrr að hún væri hálfviti. 

• Blogga um frétt