Nýja plata íslensku rokkhljómsveitarinnar Of monsters and men skaust í síðustu viku beint í níunda sæti bandaríska Billboard 200-listans, en um að ræða þekktasta topplista í tónlistarheiminum. Platan, sem ber nafnið Fever dream, kom út 26. júlí, en fyrsta smáskífa plötunnar, lagið Alligator, kom út í maí. Fever dream náði alla leið í annað sætið í Kanada í síðustu viku og í 15. sæti í Bretlandi.
Í júlí var einnig önnur smáskífa plötunnar, lagið Wild roses, gefið út, en það situr meðal annars í öðru sæti vinsældarlista Rásar 2 í þessari viku.
Á morgun verður nýr Billboard listi gefinn út og verður fróðlegt að sjá hvernig vinsældir nýju plötunnar þróast, en lagið Wars hefur meðal annars verið á ágætri siglingu á Spotify ásamt öðrum lögum plötunnar.
Fyrri plötur Of monsters and men náðu einnig inn á topp 10 lista Billboard, en fyrsta platan, My head is an animal, fór í sjötta sætið árið 2012 og Beneath the skin, sem kom út árið 2015, fór hæst í þriðja sæti.
Ofar á lista Billboard er meðal annars Íslandsvinurinn Ed Sheeran, en platan hans No.6 Collaboration projects er í þriðja sæti núverandi lista. Í öðru sæti er Chance the rapper með plötuna The big day og NF með plötuna The search er í toppsætinu.