Leikkonan og athafnakonan Mary-Kate Olsen fær ekki leyfi frá New York-ríki í Bandaríkjunum til að skilja við eiginmann sinn Olivier Sarkozy. TMZ greinir frá.
Greint var frá því í gær að Olsen hefði beðið um neyðarheimild til þess að fá að sækja um skilnað, dómstólar í New York-ríki taka ekki við umsóknum um skilnaði um þessar mundir vegna kórónuveirunnar.
Ekki er vitað hvað kom upp á milli hjónanna sem hafa verið gift frá árinu 2015. Greint var frá því í gær að lögfræðingum Olsen hefði borist tölvupóstur frá Sarkozy þar sem hann óskaði eftir því að hún yfirgæfi heimili þeirra í New York fyrir 18. maí næstkomandi.
Olsen hefur reynt að framlengja frestinn sem eiginmaður hennar gaf henni til 30. maí en hefur ekki fengið svör. Hún kveðst ekki geta yfirgefið heimili sitt vegna kórónuveirunnar og tilmælum frá yfirvöldum um að halda sig heima.