Bók sem var lánuð út á bókasafni í Middlesborough í Bretlandi fyrir tæplega 60 árum skilaði sér í hús í síðustu viku. Skilafrestur á henni rann út 21. desember 1962.
Bókin var skilin eftir í skilahólfi Middlesbrough Central-bókasafnsins í síðustu viku. Sektin fyrir sein skil hefði verið yfir 500 pund en í heimsfaraldrinum ákvað bókasafnið að hætta tímabundið að sekta fólk fyrir að skila bókum seint.
Nafn þess sem fékk bókina lánaða er óþekkt.
Bókasafnsvörðurinn Davidd Harrington sagði í viðtali við BBC að þau væru mjög þakklát þeirri manneskju sem skilaði bókinni þar sem bókin kemst aftur á hillur bókasafnsins til útláns fyrir komandi kynslóðir. Hann hvetur alla þá sem liggja á bókum sem komnar eru fram yfir skiladag að skila bókunum á meðan ekki er sektað fyrir að skila seint.