Scorsese skráði nafn sitt á spjöld sögubókanna
Setja bókamerki
Leikstjórinn Martin Scorsese skráði nafn sitt á spjöld sögubókanna í gær þegar hann hlaut tilnefningu til Óskarsverðlaunanna fyrir leikstjórn sína í kvikmyndinni Killers of the Flower Moon með Leonardo DiCaprio, Lily Gladstone og Robert De Niro í aðalhlutverkum.
Er þetta tíunda tilnefning Scorsese fyrir bestu leikstjórn á hátíðinni og með henni varð hann sá núlifandi leikstjóri sem hlotið hefur flestar tilnefningar til Óskarsverðlaunanna. Scorsese fékk sína fyrstu tilnefningu árið 1980 fyrir kvikmyndina Raging Bull.
Þar til í gær var hinn 81 árs gamli leikstjóri með jafnmargar tilnefningar og leikstjórinn Steven Spielberg, en báðir státuðu þeir sig af níu tilnefningum í flokknum. Spielberg hefur tvívegis hlotið Óskarinn fyrir leikstjórn, en hann hreppti verðlaunin árið 1994 fyrir kvikmyndina Schindler's List og aftur fimm árum seinna fyrir Saving Private Ryan. Scorsese hefur einu sinni hlotið Óskarinn fyrir bestu leikstjórn en það var árið 2006 fyrir The Departed, það er því spurning hvort að Scorsese jafni skorið við kollega sinn í ár.
Leikstjórinn William Wyler er sá eini sem hlotið hefur fleiri tilnefningar fyrir bestu leikstjórn en hann var tilnefndur 12 sinnum á ferli sínum. Hann vann meðal annars fyrir stórmyndina Ben-Hur árið 1959. Wyler lést árið 1981, 79 ára að aldri.
Oppenheimer talin sigurstranglegust
Kvikmyndin Oppenheimer í leikstjórn Christopher Nolan hlaut flestar tilnefningar eða alls 13 talsins. Nolan er sagður líklegastur til að hreppa hnossið fyrir leikstjórn en fimm hæfileikaríkir leikstjórar eru tilnefndir.
Ásamt þeim Scorsese og Nolan eru þau Justine Triet (Anatomy of a Fall), Yorgos Lanthimos (Poor Things) og Jonathan Glazer (The Zone of Interest) einnig tilnefnd. Það kom mörgum á óvart að Greta Gerwig, leikstjóri hinnar umtöluðu Barbie, hlaut ekki tilnefningu.
Níu milljónir í auglýsingar til erlendra miðla
Laugavegur hjólaferðamannsins að fæðast
Ólíkt ákall fólks á landsbyggðinni
Eru að vakta stöðuna í bólusetningum barna
Forsetinn líti yfir axlirnar á þingheimi
Innviðagjald skili 30 milljörðum
Tveggja mánaða flandur um Nýja-Sjáland
Virknin færist í aukana innan 48 tíma