Segir árekstur við halastjörnu raska forsendum stjörnuspáa

Rússneskur stjörnuspekingur hefur hótað því að fara í skaðabótamál við bandarísku geimferðastofnunina og segir að skipulagður geimárekstur í morgun við halastjörnuna Tempel 1 hafi raskað forsendum stjörnuspáa.

Stjörnuspekingurinn, kona að nafni Marina Bai, krefst skaðabóta að andvirði 300 milljóna dala, jafnvirði rúmlega 18 milljarða króna.

Að sögn rússneska blaðsins Isvestia hafði Bai þegar lagt fram kæru áður en áreksturinn við halastjörnuna varð en í morgun lenti könnunarfar frá geimskipinu Deep Impact á Tempel 1 í um 133 milljóna km fjarlægð frá jörðu. Vonast NASA til þess að gögn sem safnað er í tengslum við þennan árekstur varpi nýju ljósi á myndum sólkerfisins.

Isvestia hefur eftir stjörnuspekingnum að ljóst sé að braut halastjörnunnar og áferð alheimsins muni breytast vegna árekstursins og það muni hafa ófyrirsjáanleg áhrif á störf Bai.

Að sögn Reutersfréttastofunnar hefur NASA ekki viljað tjá sig um málið.

• Blogga um frétt