Quim Torra, nýr forseti katalónsku héraðsstjórnarinnar, sór embættiseið í dag. Torra, sem er aðskilnaðarsinni, var kjörinn leiðtogi í atkvæðagreiðslu á katalónska þinginu á mánudag. Hann var einn í framboði. Helsta baráttumál hans er sjálfstæði Katalóníu. 

Frétt af mbl.is

Torra kjörinn með 66 atkvæðum gegn 65

Stjórnvöld í Madríd ákváðu að senda ekki fulltrúa til embættistökunnar. Torra minntist einungis á katalónsku þjóðina þegar hann sór embættiseiðinn og hann minntist ekki einu orði á spænsku stjórnarskrána eða Spánarkonung. 

Þá bar hann gulan borða sem tákn um stuðning við katalónska aðskilnaðarsinna sem sitja í fangelsi. 

Sjö mánuði eru síðan kosið var um sjálfstæði Katalóníu frá Spáni. Kosningarnar voru dæmdar ólög­legar af spænskum yfirvöldum.