Hefur þú selt föt í Verzlanahöllinni síðustu mánuði? Þá er möguleiki á því að þau birtist í bandarísku þáttunum True Detective og jafnvel Jodie Foster muni sjást í þeim.

Smartland hefur heimildir fyrir því að búningahönnuðir þáttanna hafi nefnilega nýtt sér verslunina til að sanka að sér fatnaði til að nota við tökurnar, sem hafa verið í gangi síðan í október. 

Því er um að gera að hafa augun vel opin við áhorfið þegar þættirnir koma út. Það er aldrei að vita nema íbúar Ennis í Alaska sjáist í gömlu flíkinni sem þú ákvaðst að gefa framhaldslíf.

Tökur þáttanna er stærsta kvikmyndaverkefni sem ráðist hefur verið í hér á landi og hafa fyrri þáttaraðir True Detective fengið áhorf út um allan heim. Hafa tökurnar verið bæði atvinnuskapandi og arðbærar fyrir íslenskt samfélag og er hringrásarhagkerfið greinilega ekki undanskilið.

Jodie Foster leikur aðalhlutverkið í fjórðu þáttaröð True Detective.