Norskir fjölmiðlar segja í dag að flugvélar sem tilheyri leppfyrirtæki bandarísku leyniþjónustunnar, CIA, hafi farið um norska lofthelgi eða lent á norskum flugvöllum nýlega. Talið er að þessar flugvélar séu notaðar til að flytja fanga. Stavanger Aftonblad segir að ein þessara véla hafi flogið yfir Stafangur fyrir mánuði á leið frá Reykjavík til Búdapest í Ungverjalandi.

Flugvélar þessar hafa að minnsta kosti tvisvar lent á norskum flugvöllum á þessu ári eða farið gegnum norska lofthelgi frá því fangavél lenti á Solaflugvelli við Stafangur í júní.

Stavanger Aftonblad hefur eftir Pelle Dragsted, þingmanni danska Einingarlistans, að Gulfstream III-flugvél með skráningarnúmerið N50BH hafi verið á Óslóarflugvelli þann 20. júlí í sumar en haldið síðan til Parísar. Vitað er að þessi vél tilheyrir CIA. Að sögn blaðsins Chicago Tribune hefur þessi flugvél oft farið til herstöðvarinnar í Guantanamoflóa á Kúbu.

Þá kemur fram að flugvél, sem fór frá Íslandi til Búdapest í október og sagt hefur verið frá í íslenskum fjölmiðlum, fór gegnum norska lofthelgi og flaug yfir Stafangur.

Einkaflugvélar þurfa ekki sérstakt leyfi til að fljúga í gegnum norska lofthelgi en herflugvélar og flugvélar sem eru á vegum ríkisstjórna þurfa hins vegar að sækja um leyfi til slíks flugs samkvæmt alþjóðlegum sáttmálum. Það var ekki gert þegar flugvélin lenti á Sola í sumar. Stavanger Aftenblad segir að norsk stjórnvöld hafi ekki fengið svör við fyrirspurnum sínum um málið vegna þess að bandarísk stjórnvöld tjá sig aldrei um mál sem tengjast CIA.

Tengdar fréttir

Fangaflutningar

Evrópsk ríki sek um pyntingar

• Evrópuráðið rannsakar ferðir CIA-vélar
• CIA-flugvél millilenti í Keflavík
• Færeyingar fá lista yfir flugvélar CIA
• Engin CIA leynifangelsi í Þýskalandi segir innanríkisráðherrann

» Fleiri tengdar fréttir

• Blogga um frétt